12 ka Bol-anong magmumugna

misalmot sa 2017 Manila FAME

TAGBILARAN CITY, October 23 (PIA)--Malampusong misalmot ang napulo'g duha ka mga gagmay nga mamumuhunang Bol-anon sa Manila Furnishings and Apparel Manufacturers' Exchange (FAME) didto sa World Trade Center sa Pasay niadtong Octubre 20-22, 2017.

Ang Department of Trade and Industry pinaagi sa Center for International Trade Expositions and Mission (CITEM) mipasi-ugda sa 2017 Manila FAME, ang giisip nga labing dako nga international nga exhibition sa mga sinibit nga gamit ug mga buhat sa kamot (handicrafts) gikan sa Pilipinas. 

Gilusad niadtong 1983, ang Manila FAME miangkon nga ika duha sa labing dugay nang nagdagan nga trade event kabahin sa mga ginamang gamit sa balay (houseware), furnishings, gift items, dekorasyon sa Pasko ug fashion accessories sa rehiyon sa Asia-Pacific.

Dako nga dungog sa mga Bol-anong magmumugna ang pagka-apil sa Manila FAME tungod kay niini, makit-an ang ilang produkto sa international nga merkado, matud sa DTI. 

Gani, matud pa, ang Manila FAME maoy bugtong tradeshow sa nasud nga gi-ila sa Union des Foires Internationales, ang nagkahugpong nga nag-unang tigpasiugda og tradeshow, fairground owners, ug major national ug international associations sa industriya sa exhibitions.

Dinhi, ang mga mamalitay sa tibuok kalibutan mamalit ug mangita'g mga bag-ong produkto nga ila na usab nga ikabaligya ig idisplay samtang nangita silag lain pang mga suppliers. 

Sa Manila FAME, kapin sa 400 ka mga exhibitors sa lukop nasud ang misalmot samtang gitanyag didto ang mga pavillion sa provincial ug regional showcases. 

Dinhi, nagpahimutang og mga Artisan Villages aron kahatagan og tsansa ang mga lalawigan sa pagdisplay sa ilang produkto aron makit-an usab sa mga buyers. 

Gidala sa 12 ka mga Bol-anong exhibitors ug craft manufacturers ang ngalan sa Bohol lakip na usab ang brand sa Mugna’ng Bol-anon Artisan Village. 

Sa wala pa ang ilang pagsalmot, ang mga gigmayng mamumuhunan gitabangan sa DTI sa pagpanindot sa ilang mga produkto gamit ang serbisyo sa mga eksperto gikan sa CITEM ug DTI. 

Gawas pa, miagi silang tanan sa Export Coaching Seminar nga gidumala sa CITEM aron andamon sila sa exhibition. (rahc/PIA-7/Bohol/DTI)

Gipabansiwag sa 12 ka mga Bol-anong exhibitors ang Bohol brand sa Mugna'ng Bol-anon salabing bag-o nga Manila FAME diin kapin sa 400 ka mga entrante sa lukop nasud ang mipakatag sa ilang mga gipasigarbong mugna. (DTI)