Kampanyang ‘Be RICEponsible’

giduso sa DA

TAGBILARAN CITY, Oct. 25 (PIA)--Giduso karon sa Department of Agriculture (DA) ang ilang kampanyang ‘Be RICEponsible.’ 

Matud pa ni Cheryl Dela Victoria, Information Officer II sa DA Regional Field Unit 7 nga kini ang inisyatiba sa ilang buhatan aron iduso ang responsableng pagkaon og humay sa pagpakunhod sa pag usik-usik og kan-on sa kabalayan, ug pagkaon og mas masustansiyang brown rice.

Kini, agi usab og pagpangandam sa kasaulogan sa National Rice Awareness Month karong buwan sa Nobyembre.

Atol sa tigom sa mga miyembro sa Association of United Development Information Officers in Bohol (AUDIO-Bohol), gi-awhag ni Dela Victoria ang mga information officers sa paghinay-hinay sa pagkaon og bugas humay taliwala sa isyu sa pagtanyag og unlimited rice o “unli rice” sa mga kan-anan.

Kini tungod sa giingon sa Philippine Rice Research Institute (PhilRice) sa DA nga maghinay-hinay sa kan-on tungod kay ang subrang pagkaon niini aduna usab dautang epekto sa lawas.

Giingong sa usa ka pagtuon sa Harvard School of Public Health, ang sobrang pagkaon sa bugas humay mahimong makadaot sa glucose metabolism ug insulin production sa lawas nga posibleng makaingon sa pagbaton og diabetes.

Nadiskobrehan usab sa pagtuon nga ang carbohydrate content sa usa ka bowl nga kan-on susama sa kapin sa doble sa usa ka lata nga soft drink ug ang usa ka platong white rice nga gikaon matag adlaw magpataas sa kakuyaw sa diabetes og 11 porsiyento.

Tungod niini, ang DA nanghangyo sa mga lokal nga kagamhanan sa pag-isyu og ordinansa ug resolusyon nga mosuporta sa ilang adbokasiya. (ecb/PIA7-Bohol)

Si Cheryl Dela Victoria, IO II sa DA RFU-7 mi-awhag sa publiko nga mahimong responsible sa ilang pagkaon sa bugas humay agi og pagduso sa ilang kampanyang ‘Be RICEponsible.’ (ecb/PIA7-Bohol)

================

Sakop sa 20% student discount,

mas gipalapdan pa sa LTFRB

TAGBILARAN CITY, Oct. 25 (PIA)--Gilagdaan na ni Land Transportation Franchising and Regulatory Board (LTFRB) Chairman Martin Delgra ang usa ka memorandum circular nga nagpalapad sa 20 porsiyentong diskuwento alang sa mga estudyante.

Base sa Memorandum Circular 2017-024 sa LTFRB, entitled ang mga estudyante sa 20% fare discounts sa tanang mga pampublikong mga sakyanan.

Sakop niini ang tanang mga adlaw sa tibuok semana apil na ang mga legal ug special holidays, apil na usab ang summer break.

Samtang dili sakop sa maong diskuwento ang mga post-graduate student sama sa mga nikuha og medicine, law ug uban pang mga masteral ug doctorate degrees.

Mahimong epektibo kining kamanduan human ang kinse ka adlaw human mapatik ang mga nahisulod niini sa mga major dailies sa nasod. 

Matud pa sa LTFRB nga amendment kini sa Memorandum Circular 2005-014 o ‘the grant of fare discount to elderly, disabled persons and students’. 

Sa nahiunang memorandum, ang mga estudyante wala gitugotan sa pag-avail sa 20% diskuwento sa mga adlaw’ng Sabado ug Domingo, legal ug special legal holidays, Christmas ug summer breaks. (ecb/PIA7-Bohol)