Visayas ug Bicol region, 

ulanon tungod sa bagyong Quedan

TAGBILARAN CITY, Oct. 26 (PIA)--Nipasidaan ang Philippine Atmospheric, Geophysical and Astronomical Services Administration (PAGASA) nga makasinati og mga pag-ulan ug thunderstorms ang pipila ka parte sa rehiyon sa Visayas ug Bicol, lakip na usab ang mga lalawigan sa Aurora ug Quezon.

Kini tungod sa bagyong Quedan nga katapusang nasigpatan sa PAGASA sa gilay-ong 1,250 kilometro sidlakang bahin sa Casiguran, Aurora.

Dala niini ang hangin nga mokabat sa 80 kilometro matag oras ug pagbugso nga mokabat sa 95 kilometro matag oras.

Naglihok ang bagyo sa direksyong amihang-kasadpan sa kusog nga 21 kph.

Samtang usa usab ka Intertropical Convergence Zone (ITCZ) ang nakaapekto karon sa Palawan ug Mindanao diin magdala kini og madag-omon nga kalangitan ngadto sa patak-pat-ak nga pag-ulan ug thunderstorms. (ecb/PIA7-Bohol)

===============

Guerrero, bag-ong AFP chief

TAGBILARAN CITY, Oct. 26 (PIA)--Gibutang na ni Presidente Rodrigo Duterte si Eastern Min­danao Command Chief Lt. Gen. Rey Leonardo Guerrero isip bag-ong Armed Forces of the Philippines (AFP) Chief of Staff.

Hulipan ni Guerrero si Gen. Eduardo Año nga mo-retiro na sa serbisyo.

Si Guerrero nga miyembro sa Philippine Military Academy (PMA) Class 1984 duha ka buwan lamang gunitan ang maong posisyon tungod kay gitakda usab kining mo-retiro sa Disyembre.

Kahinumdoman nga una nang gisaad ni Presidente Duterte kang Guerrero ang puwesto niadtong Hunyo 2 diin giparetiro niini og sayo si Año apan wala kini nadayon tungod sa pagbuto sa Marawi siege nga milanat og lima ka buwan.

Nahimong hingpit nga karibal ni Guerrero si AFP Western Mindanao Command Chief Lt. Gen. Carlito Galvez Jr.

Ipahigayon ang turnover ceremony karong adlawa diin pinasidunggang dinapit si Presidente Duterte. (ecb/PIA7-Bohol)

=============

DOE, niduso sa e-vehicles sa Bohol

alang sa ‘clean air program’

TAGBILARAN CITY, Oct. 26 (PIA)--Giduso sa Department of Energy (DOE) dinhi sa lalawigan sa Bohol ang ‘clean air program’ aron makaangkon sa seguridad sa enerhiya ug pag-ugmad sa maong igsusugnod samtang nagakatigom sa mga environmental challenges pinaagi sa paggamit sa mga alternative fuels. 

Ang DOE nipadala dinhi sa Bohol sa 3 nila ka senior science research specialists aron e- presentar ang Alternative Fuels Program sa gobyerno ngadto sa asosasyon sa mga public utility operators ug drivers, local government units, academe, estudyante ug media sa usa ka forum nga gipahigayon sa Kew Hotel niadtong Oktubre 24 sa pakigtambayayong sa Philippine Information Agency (PIA).

Katuyoan sa DOE nga sukdon ang “commercial viability, technical requirements, market demand, impact of incentives ug public acceptance” sa Natural Gas Vehicle (NGV) Program. 

Gipasabot ni PIA-7 OIC Fayette Riñen nga nagpahigayon sila og advocacy campaign sa gobyerno sa NGV Program for Public Transport diin ang DOE maoy lead agency ug gipahigayon na ang mga serye sa information education campaign (IEC) sa ubang rehiyon sa tibuok nasod ug alang sa Central Visayas, Bohol ang napiling lalawigan.

“The direction of the current administration now is to use cleaner, alternative energy fuels like the auto LPG, natural gas and e-vehicles for the transport sector,” matud pa ni Riñen.

Si Christie Bauzon, senior science research specialist sa DOE nipasabot nga ang mga hagit nga giatubang sa sektor sa enerhiya naglakip sa nagkadaghan nga demand sa enerhiya, taas ug mausab-usab nga presyo sa petrolyum ug nagkaubos nga kalidad sa hangin.

Si Engr. Loreto Mancada, usa usab ka senior science research specialist sa DOE, ni-presentar sa alternative transport fuels and technologies roadmap alang sa Auto LPG Program diin plano sa gobyerno nga sulod sa tuig 2017-2019, ang DOE makasugod na sa identification of alternative fuels and technologies (AFTs) for application.

Sa tuig 2020-2025, ang DOE magsugod sa preparasyon sa regulatory ug infrastructure requirements sa identified AFTs ug sa 2026-2030, target sa niini nga ang AF vehicles mabutang na sa transport sektor.

Samtang si Engr. Jorge Vincent Bitoon, usa usab ka senior science research specialist sa DOE miingon nga ang Alternative Fuels Program gi-disenyo aron makab-ot ang seguridad sa enerhiya ug fuel diversification samtang matagbo ang environmental challenges pinaagi sa paggamit sa alternative fuels. (ecb/PIA7-Bohol)

Ang mga senior science research specialists sa DOE nga sila Engr. Jorge Vincent Bitoon, Christie Bauzon ug Engr. Loreto Mancada nitubag sa mga pangutana sa mga nitambong sa IEC on Alternative Program for Transportation nga gipahigayon niadtong Oktubre 24 sa Kew Hotel, syudad sa Tagbilaran. (ecb/PIA7-Bohol)

Gipasabot ni PIA-7 OIC RD Fayette Riñen sa mga nitambong sa gipahogayong IEC on Alternative Program for Transportation nga ang direksiyon sa kasamtangang administrasyon karon mao ang paggamit og limpyo ug alternative energy fuels sama sa auto LPG, natural gas ug e-vehicles alang sa sector sa transportasyon. (ecb/PIA7-Bohol)