Dr. Francisco Duque, 

gitudlong kalihim sa DOH 

TAGBILARAN CITY, Oct. 27 (PIA)--Gitudlo na ni Presidente Rodrigo Duterte si Dr. Francisco Duque III isip kalihim sa Department of Health (DOH) hulip ni Paulyn Ubial nga wala nakalusot sa Commission on Appointments (CA).

Naglaom ang Malakanyang nga pamunoan og maayo pagbalik ni Duque ang DOH.

Matud pa ni Presidential Spokesman Ernesto Abella, dili na bag-o kang Duque ang maong posisyon mao nga masaligon ang Presidente nga mas mahimong produktibo karon ang buhatan aron maalagaran ang mga panginahanglang medikal sa matag Pilipino.

Si Duque ang kanhi kalihim sa DOH sa panahon ni kanhi Presidente ug karon Pampanga 2nd District Representative Gloria Arroyo, sugod sa tuig 2005 taman 2010.

Ubos sa administrasyon ni kanhi Presidente Benigon ‘Noynoy’ Aquino, mi-alagad usab si Duque isip Civil Service Commission (CSC) Chairman hangtod niadtong 2015.

Sa wala pa ang iyang re-appointment sa buhatan, si Duque gibutang ni Duterte isip board member sa Government Service Insurance System (GSIS). (ecb/PIA7-Bohol)

==============

10-yr. Philippine passport validity,

magsugod na sa Enero sunod tuig

TAGBILARAN CITY, Oct. 27 (PIA)--Gipagawas na sa Department of Foreign Affairs (DFA) ang Implementing Rules and Regulations sa Republic Act No. 10928 o mas gi-ilang “An Act Extending the Validity of Philippine Passports.”

Sa gipagawas nga Department Order No. 010-2017, walay mabag-o sa mga bag-ong passport gawas lang sa ten-year extension validity period niini.

Epektibo ang maong validity period sugod sa Enero 1, 2018.

Sakop niini ang mga Pilipinong may edad 18 anyos pataas samtang lima ka tuig pa gihapon ang validity sa mga Pilipinong mas ubos pa sa 18 anyos ang pangedaron.

Magkantidad ang ten-year passport og P950 diin kini usab ang kasamtangang presyo sa five-year passport.

Samtang giingong posibleng magbaton og dugang bayad sa mga ipagawas nga bag-ong passports tungod kay posibleng butangan kini og mga enhanced features. (ecb/PIA7-Bohol)

=============

5-day processing sa mga 

dokumento sa BOC, ipatuman na

TAGBILARAN CITY, Oct. 27 (PIA)--Gipadali ni Customs Commissioner Isidro Lapeña ang pag-proseso sa mga dokumento sa Bureau of Customs (BOC).

Kini base sa Memorandum Order 24-2017 nga gilagdaan ni Lapeña diin nakalatid nga kinahanglang matubag ang mga sulat, requests ug permits sulod sa lima ka adlaw lamang gikan sa pagkadawat niini.

Matud pa ni Lapeña nga tungod sa mga pagkalangay, maule sa pagpanuhol ang importers tungod kay mangita man kini og mga tawo nga mahimong molihok sa ilang mga kargamento ug dokumento.

Gimanduan usab sa commissioner ang Account Management Office nga himuong mas organisado ug paspas ang accreditation sa mga importers, exports ug brokers. 

Matud pa nga mokabat man gud sa usa hangtod duha ka buwan ang pag-release sa mga dokumento.

Gi-agda ni Lapeña ang mga aplikante sa pag-adto sa iyang opisina kun dili mahatag ang ilang permits sulod sa lima ka araw.

Tumong niining bag-ong lakang sa BOC nga sumpuon ang korapsiyon sa ilang buhatan. (ecb/PIA7-Bohol)