Roque, bag-ong spokes-

man ni Pres. Duterte

MANILA, Oct. 30 (PIA)--Gibutang ni Presidente Rodrigo Duterte si Kabayan party-list Rep. Harry Roque isip iyang bag-ong tigpamaba hulip ni Presidential Spokesman Ernesto Abella.

Mismong si Duterte ang nipahayag niini atol sa dinner alang sa adlaw’ng natawhan ni Roque sa Davao City.

Miingon ang Presidente nga dili na congressman si Roque ug usa na kini ka kalihim.

Gikumpirmar usab kini ni Roque nga gidawat na niya ang tanyag ni Duterte nga mahimong Presidential Spokesman.

Gipahayag usab ni Duterte nga motambong na si Roque sa Cabinet meeting sa Malakanyang sa Nobyembre 6 paghuman sa iyang biyahe sa Japan.

Samtang gipahayag ni Roque nga dili gihapon mabag-o ang iyang posisyon kalabot sa human rights.

Miingon si Roque nga nagtuo pa gihapon siya nga angay hatagan og proteksiyon ang tawhanong katungod sa tanan.

Gipasabot pa ni Roque nga ang iyang pagdawat sa posisyon wala nagpasabot nga gi-konsintir na niini ang mga pagpatay nga gilambigit sa anti-drug war sa Duterte administration, apan giingong magpabilin ang iyang human rights advocacy.

Gipahayag usab ni Roque nga apil sa hinungdan sa pagdawat niya nga mahimong miyembro sa gabinete mao ang masultihan ug matambagan si Presidente Duterte sa pagtubag sa human rights issues sa nasod. (ecb/PIA7-Bohol)

==================

Eduardo Año, gibutang 

sa DILG ni Duterte

MANILA, Oct. 30 (PIA)--Usa ka adlaw human sa iyang pagretiro, pormal nang gibutang sa Department of Interior and Local Government (DILG) si kanhi Armed Forces of the Philippines (AFP) Chief of Staff Eduardo Año.

Base sa appointment paper nga gipagawas sa Malakanyang, gibutang si Año isip bag-ong undersecretary sa DILG.

Gilagdaan ni Presidente Rodrigo Duterte ang maong appointment nga may petsang Oktubre 26, 2017.

Niadtong Huwebes, pormal nang niretiro sa pwesto si Año ug nihulip kaniya isip bag-ong hepe sa AFP si Lieutenant General Rey Leonardo Guerrero nga commanding general sa Philippine Army sa Wastern Mindanao.

Kadali lamang ang mahimong pag-alagad ni Guerrero sa AFP tungod kay gitakda usab kining mo-retiro karong Disyembre. (ecb/PIA7-Bohol)

==============

Pagpa-ilis sa daang salapi, 

gi-uswag pa sa BSP taman Dis. 29 

TAGBILARAN CITY, Oct. 30 (PIA)--Gi-uswag pa sa Bangko Sentral ng Pilipinas ang deadline sa pagpa-ilis sa mga daang salapi nga walay bayad sa mga BSP cash department, regional offices ug branches.

Base sa bag-ong advisory nga gipagawas sa BSP, gi-uswag taman Disyembre 29 ang pagpa-ilis sa mga daang salapi apan gilimitahan lamang kini og taman P100,000 matag transaksiyon.

Kun mas dako pa niini ang kinahanglang paalisdan, kinahanglang magbayad pinaagi sa tseke o direct credit sa bank account.

Una nang gitakda sa BSP niadtong Hulyo 30 ang deadline sa pagpa-ilis apan tungod sa hangyo sa publiko, nisugot silang i-uswag kini.

Sa higayong dili mapa-alisdan ang mga daang salapi paglapas sa deadline, mawad-an na kini og balor. (ecb/PIA7-Bohol)

================

DOLE, nipahinumdom kalabot sa 

‘no work, no pay’ karong kalag-kalag

TAGBILARAN CITY, Oct. 30 (PIA)--Nipahinumdom ang Department of Labor and Employment (DOLE) kalabot sa “no work, no pay” sa Oktubre 31 ug Nobyembre 1, human sa proklamasyon ni Presidente Rodrigo Duterte nga Special Non-Working Days ang maong mga petsa.

Matud pa ni DOLE Kalihim Sylvestre Bello III, nahisulod niining kamandoan ang mga empleyadong mosulod sa ilang trabaho sa maong mga adlaw, bisan pa nga special holiday kini.

Gipahayag sa kalihim nga angay makadawat og dugang 30 porsiyento sa unang walo ka oras ang maong mga empleydo ug dugang 30 porsiyento pa kun mosubra pa gihapon sa walo ka oras ang ilang pag-trabaho.

Gitumbok ni Bello nga nagpadala na sila og labor advisory alang sa mga kompanya ug trabahante niini kalabot sa sumbanan sa adlaw sa kalag-kalag human gi-dekalarar sa Malakanyang nga special non-working days ang maong mga adlaw. (ecb/PIA7-Bohol)