Pinoy Pride 43 sa Tagbilaran

Bol-anong boxer ang topcard

TAGBILARAN CITY, November 3, 2017 (PIA)--Agi og gasa sa syudad sa Tagbilaran ngadto sa mga Bol-anon ilabi na sa nagsunod sa boksing, dalhon dinhi sa Bohol ang sikat nga Pinoy Pride 43 ug mga Bol-anong boksidor ang moduwa dinhi. 

Matud ni Mayor John Geesnell Yap, way puas ang suporta sa syudad sa mga taga Tagbilaran, ilabi na kay nia niini si Mark Magsayo, usa ka tigpamaligya og ice cream nga taga Booy nga karon, usa na ka inilang boksidor sa han-ay sa mga talents sa Ala Gym. 

Gani, sa nakab-ut nga kadaugan niini batok sa Nicaraguan nga si Danilo Diaz, gitunol ni Mayor Yap ang P32 mil nga tabang pahalipay sa Bol-anong boksidor kansang kaugmaon nag-ong-ong na sa pagka world champion. 

Nakita usab sa mayor ang posibilidad sa turismo ug sports sa pagdawat sa syudad sa Pinoy Pride 43. 

Si Magsayo maoy main fight sa Pinoy Pride 43 nga himoon sa Bohol Wisdom School Gym sa Nobyembre 25, 2017 sa alas 6:00 sa gabii. 

Lupig man sa reach, ug sa ka beterano sa sunod niyang kaatbang, paningkamotan ni Mark Magnifico Magsayo nga malingaw ang mga Bol-anon sa ika Pinoy Pride 43 nga ani himoon sa Tagbilaran. 

Si Mark Magsayo gipresentar nagdto sa mga sakop media sa Syudad sa Tagbilaran pinaagi ni Mayor Yap ug sa Ala Gym Nobyembre 3 atul sa usa ka press conference didto sa City Hall Atrium. 

Main Fight si Pinoy Pride 43 si Magsayo batok sa usa ka boksidor nga Hapon nga si Shota Hayashi alang sa World Boxing Organization (WBO) International Featherweight Championship sa 126 libras nga timbang. 

Si Magsayo may 17 na ka daug diin 13 niini ang pinaagi sa pag knock-out sa kontra samtang ang beteranonsg si Hayashi may 30 na ka daug, 18 niini iyang nakab-ut sa pagpalup-og sa kontra. 

Hinuon, wala pay pilde si Magsayo samtang ang kontra niini nakatilaw nag unom ka kaparutan ug usa ka tabla sa iyang 37 ka away human sa iyang boxing debut. 

Dehado man sa parang, gipasalig ni Magsayo nga iyang paningkamotang malingaw ang mga manan-aw sa iyang away sa Bohol.

Kon may makita kitang opurtunidad nga tumbahon ang kalanan, dili na nato palabyon, saad sa boksidor nga may 76% nga knock-out percentage. 

Undercard sa Pinoy Pride 43 ang mga Tagbilaranon usab nga si Virgel Vitor nga makigsinumbagay ni Johnrey Logatiman nga taga Paranaque alang sa 122 libras. 

Si Prince Albert Pagara sa Maasin batok kang Mohammed Chico Kambaluta bfa Tanzanian alang sa 123 libras. 

Si Melvin Jerusalem nga taga Manolo Fortich Bukidnon makig-away kang Pedro Taduran nga taga Valenzuela City alang sa 105 libras nga timbang. 

Si Jeo Santino Santisima makigharung usab kang Kichang Kim nga Indonesian. 

Makigaway usab si Rocky Fuentes (Cebu City) batok ni Ryan Tampus (Bato Leyte), si Esneth Domingo (Sultan kudarat) makig-agbat ni Lowell Saguisa (Bato Leyte) samtang si Christian Bacolod (Cebu City) makig-away ni Ryan Makiputin (Valencia City Bukidnon). (rahc/PIA-7/Bohol) 

Pangturismo ug pang sports, si mayor John Geesnell Yap nagpakita sa iyang suporta ni Mark Magnifico Magsayo uban sa Ala Gym coach Edmund Villamor atul sa pagpresentar sa Pinoy Pride 43 sa mga sakop sa media Nobyembre 3 didto sa City Hall. (rahc/PIA-7/Bohol)