Voter’s registration, gibuksan og 

balik sa Comelec karong adlawa

TAGBILARAN CITY, Nov. 06 (PIA)--Sa pagbukas og balik sa voter’s registration karong adlawa, gi-awhag sa Commission on Elections (Come­lec) ang mga botante sa pagparehistro aron makasiguro nga makasalmot sa Barangay ug Sangguniang Kabataan Elections sa Mayo 2018.

Ang subling pagbukas sa mga lokal nga buhatan sa Comelec aron ipadayon ang voters’ registration sugod karong adlawa, Nobyembre 6 magpadayon hangtod sa Nobyembre 30, 2017.

Ang pagpadayon sa voter’s registration gipatuman sa Comelec agig pagsunod sa Resolution 10214, nga gilagdaan sa Comelec En Banc niadtong Oktubre 24, 2017.

“In view of the postponement of the Barangay and Sangguniang Kabataan Elections (BSKE), there is a need to resume the conduct of registration of voters for the members of the Katipunan ng Kabataan (KK) who will reach fifteen (15) years old pursuant to Republic Act No. 10742 and regular voters for the Barangay in connection with the ‪May 14, 2018 Synchronized BSKE,” nakalatid sa re­solusyon.

Gipahinumdom og balik sa Comelec nga ang mga aplikasyon alang sa registration, reactivation, change/correction of entries ug inclusion o reinstatement of records sa listahan sa mga botante angay nga lagdaan og personal sa mga buhatan sa Election Officers sa ilang lugar diin nanimuyo ang botante.

Abli ug modawat sa mga magpa-re­histro ang mga lokal nga buhatan sa Come­lec gikan alas ‪8:00 sa buntag taman alas ‪5:00 sa hapon, sugod Lunes hangtod Sabado, apil na ang mga adlaw nga holiday nga nahisulod sa maong mga petsa. (ecb/PIA7-Bohol)

===============

National Rice Awareness Month,gisa-

ulog karong buwan sa Nobyembre

TAGBILARAN CITY, Nov. 06 (PIA)--Gi-awhag sa Department of Agriculture (DA) ang publiko nga makighiusa sa pagsaulog sa National Rice Awareness Month karong buwan sa Nobyembre.

Nagdala sa temang "Ready? SET rice!” ang kasaulogan karong tuig nagtutok sa pag-awhag sa publiko sa pagkonsumo sa saktong proporsiyon sa kan-on ug ang sustansiya nga mahatag niini sama sa brown rice ug rice mixes.

Kalabot niini, giduso karon sa DA ang ilang kampanyang ‘Be RICEponsible.’ 

Matud pa ni Cheryl Dela Victoria, Information Officer II sa DA Regional Field Unit 7 nga kini ang inisyatiba sa ilang buhatan aron iduso ang responsableng pagkaon og humay sa pagpakunhod sa pag usik-usik og kan-on sa kabalayan.

Gi-awhag usab sa DA ang pagkaon sa mas masustansiyang brown rice kun itandi sa naandan nang puting kan-on aron malikayan ang sakit nga diabetes ug uban pang sakit.

Kini tungod kay ang brown rice giingong puno sa protina, bitamina, minerales ug dietary fiber nga makatabang sa pagkontrolar sa blood sugar level ug pagpa-ubos sa bad cholesterol.

Giingong mas sustansiyado ang kan-on kun sagolan usab kini og uban pang sangkap sama sa mais, saging, kamote, ug uban pa. (ecb/PIA7-Bohol)