Mga job openings sa Saudi ug 

Taiwan, gi-anunsiyo sa POEA

TAGBILARAN CITY, Nov. 07 (PIA)--Gi-anunsiyo sa Philippine Overseas Employment Administration (POEA) ang mga job openings sa Saudi Arabia ug Taiwan.

Apil na niini ang 1,200 ka nurses ug 100 ka respiratory therapists sa Saudi Arabia diin ang mga sweldo niini magsugod sa P56,000 taman sa P109,000 matag buwan.

Samtang gipahibalo usab sa POEA nga nangita usab og 200 ka factory workers sa food processing, food analysis inspectors ug bakers ang Taiwan diin mokabat sa P35,000 ang sweldo matag buwan.

Giingong mahimong mo-apply sa mga nahisgotang posisyon ang mga high school graduates.

Apan gibutyag ni POEA Deputy Administrator Jocelyn Sanchez nga angay magpa-rehistro ang mga gustong mo-apply og trabaho sa ilang buhatan.

Gipasabot pa niini nga documentation fee na lang ang gastohon sa mga aplikante ug dili na apil ang placement fee.

Nagpahinumdom usab ang POEA sa mga aplikante nga mag-amping sa mga iligal recruiters ilabi na ang mga nagpakatap og dili tinuod nga impormasyon sa social media. (ecb/PIA7-Bohol)

================

OFWs, gipasidan-an sa POEA batok sa mga 

tanyag nga trabaho gikan sa third country

TAGBILARAN CITY, Nov. 07 (PIA)--Nipasidaan ning bag-o lang ang Philippine Overseas Employment Administration (POEA) sa mga overseas Filipino workers nga kasamtangang nagtrabaho sa ubang nasod nga mas mag-amping sa pagdawat og tanyag nga trabaho gikan sa ubang nasod.

Kini human makadawat og report ang POEA nga may mga Filipino household service workers (HSWs) sa Hong Kong, Singapore ug Cyprus nga gitanyagang mobalhin sa ubang nasod sama sa Dubai, Mongolia, Turkey ug Russia apan sa kadugayan, ilang mahibaw-an nga dili diay maayo ang kondisyon sa ilang trabaho ug ang uban, dili diay tinuod ang gitanyag nga trabaho.

Ang mga nag-recruit giingong gikan sa mga third country nga may mga kakunsabo nga Filipino sa ilang ilegal nga buhat.

May mga nadawat silang report nga may mga trabahanteng nabiktima ug nibayad og dagkong kantidad ug ni-biyahe sa mga third country gamit ang tourist visa ug walay kasigorohan nga may employer nga naghulat kanila.

Giingong may nadawat usab silang report nga may mga nakapangita og trabaho apan nakasinati kini og pang-abuso gikan sa ilang employer ug nahimong makaluluoy ang maong mga trabahante tungod sa kakulang sa saktong dokumento ug gi-aresto ug gipa-deport sa immigration authorities.

Gitataw sa POEA nga ang pag-recruit pinaagi sa third country gikonsiderar nga illegal recruitment kun ang recruiter o ang employer walay awtorisasyon gikan sa gobyerno sa Pilipinas.

Alang sa ilang kaugalingong proteksiyon, ang aplikante alang sa trabaho sa ubang nasod angay nga may saktong work permit o visa o employment contract nga gi-aprobahan sa Philippine Overseas Labor Office (POLO) ug gi-proseso sa POEA sa wala pa nigawas sa nasod. (ecb/PIA7-Bohol)