Pagbayad og buhis, mapadali 

na sa bag-ong website sa BIR

TAGBILARAN CITY, Oct. 20 (PIA)--Dili na kinahanglan pang molinya sa pagbayad og buhis sa mga buhatan sa Bureau of Internal Revenue (BIR). 

Kini tungod kay mas gipadali na karon ang proseso sa pagbayad diin mahimo nang himuon ang transaksiyon pinaagi online.

Sa pakig-alayon sa BIR sa Development Bank of the Philippines (DBP), gilusad kagahapon sa kaulohan ang Pay Tax Online.

Kinahanglan lamang nga mag online sa www.dbppaytax.com.

Kun makasulod na, may mga kinahanglang impormasyon nga angay i-input o tubagon.

Human niini, mahimo nang mag online payment gamit ang Visa card, MasterCard credit card o debit card. (ecb/PIA7-Bohol)

================

‘Standing break’ alang sa mga empleyadong 

kanunay naglingkod, requirement na 

TAGBILARAN CITY, Oct. 20 (PIA)--Usa na ka ’requirement’ alang sa mga trabahante nga walo ka oras nga naglingkod sa ilang trabaho nga mahatagan og ‘standing break’.

Ubos sa Department Order No. 184 sa Department of Labor and Employment (DOLE), kinahanglang mahatagan og regular nga 5-minute break ang usa ka trabahante sa matag duha ka oras nga nakalingkod kini sa iyang gimbuhaton.

Matud pa sa buhatan, kini aron dili mabutang sa alanganin ang panglawas sa mga trabahante nga kanunay lamang naglingkod sa ilang inadlaw-adlaw nga trabaho.

Kauban sa mga mahimong mahatagan og ‘standing break’ ang mga empleyado nga kasagarang naghimo og ‘clerical works’, mga kumpanya sa BPO o call center ug information technology (IT).

Ipatuman kining kamanduan sa unang semana sa Nobyembre. (ecb/PIA7-Bohol)

============

Bohol, nidaog isip Most 

Business-Friendly Province 

TAGBILARAN CITY, Oct. 20 (PIA)--Nasakmit sa probinsiya sa Bohol ang Most Business-Friendly Local Government Unit Provincial Level Award gikan sa Philippine Chamber of Commerce and Industry (PCCI).

Si Presidente Rodrigo Duterte mismo ang nitunol sa plake kang Gob. Edgar Chatto atol sa 43rd Philippine Business Conference (PBC) and Expo didto sa Manila Hotel kagahapon, Oktubre 19, 2017.

Gisaksihan kini ni Department of Trade and Industry (DTI) Kalihim Ramon Lopez ug Bohol Acting Vice Gob. Venzencio Arcamo.

Kahinumdoman nga sa labing unang higayon, nasulod ang lalawigan sa Bohol sa 14 ka finalists sa bangga sa Most Business-Friendly Province sa tibuok nasod nga gipahigayon sa PCCI.

Matag tuig, ang PCCI mohatag og pasidunggog sa mga local government units, apil na sa mga syudad ug munisipyo nga nagpakita og bantogang kakugi sa pagtarok og ‘good governance reforms’.

Ang ubang finalist nga lalawigan mao ang Aklan, Bataan, Bulacan, Cavite, Cebu, Davao del Norte, Isabela, La Union, Negros Occidental, Pangasinan, South Cotabato ug Tarlac.

Ang Cebu nga usa usab ka probinsiya sa Central Visayas, midaog na kaniadto samtang ang Bulacan nagtinguha usab sa ilang ikatulong sunod-sunod nga titulo alang sa Hall of Fame. (ecb/PIA7-Bohol)