Malakanyang: Duterte, seryoso sa 

jeepney modernization project 

MANILA, Oct. 19 (PIA)--Giseguro sa Malakanyang nga dili makig-kumpromiso si Presidente Rodrigo Duterte sa transport group kun masakripisyo ang kaayohan sa mga pasahero.

Matud pa ni Presidential Spokesman Ernesto Abella, pursigido ang presidente nga magpatuman og reporma sa sektor sa transportasyon.

Gitumbok pa ni Abella nga ang gihatag nga ultimatum sa presidente sa grupong Piston nga mosunod sa modernization program pag-abot sa Enero 1, 2018 pagmatuod lamang nga aduna kini ‘political will’.

Giingong dili magpatarog ang presidente sa mga paghunong sa pamasada tungod kay kinahanglan na nga mopatigbabaw ang interes sa katawhan.

Gipahayag usab ni Abella nga bukas ang gobyerno alang sa hapsay ug produktibong pakigsabot-sabot alang sa mga gustong makat-on ug mohatag og kontribusyon sa pagpalambo pa sa PUV Modernization Program. (ecb/PIA7-Bohol)

============

LGUs, gi-awhag sa DepEd

sa pagpatukod og museo

MANILA, Oct. 19 (PIA)--Gi-awhag ni Department of Education (DepEd) Kalihim Leonor Briones ang tanang local government units (LGUs) sa pagpatukod og ilang museo.

Tuyo niining mahatagan og kahibalo ang mga residente sa lungsod sa gigikanan sa ilang lugar ug makita usab kun unsa ang mga mahinungdanong butang nga gibilin sa mga nahiuna pang lider sa ilang lungsod.

“I noticed that the National Museum is helping local governments, and I hope some of our friends and benefactors will think about it, and set up their own local museums,” pasabot pa ni Briones.

Matud pa sa Kalihim nga kauban na dinhi nga makita ang mga talagsaong kanindot sa ilang nasakupan ug ang gigikanan niini.

Giingong makaayong mahibaw-an sa tanan nga adunay maanindot nga kasaysayan ang nagkadaiyang lugar ug maayo usab nga makita ang mga larawan sa mga niaging mga opisyal ug ang mga nahimo niini nga ibutang sulod sa museo.

Dungan na usab ang pagbutang og mga larawan sa bayani sa nasod aron mahibaw-an usab ang nahimo niini sa nasod. (ecb/PIA7-Bohol)