Voter’s registration, 

buksan og balik sa Nob. 6

TAGBILARAN CITY, Oct. 17 (PIA)--Buksan og balik sa Commission on Election (Comelec) ang pagpahigayon og voter’s registration alang sa piniliay sa Barangay ug Sangguniang Kabataan human sa gihimong pagsuspinder sa piniliay.

Gipahibalo ni outgoing Comelec Chair Andres Bautista nga molanat lamang og 25 ka adlaw ang voter’s registration diin magsugod kini sa Nobyembre 6 ug matapos sa Nobyembre 30.

Tuyo niining mahatagan og kahigayonan ang mga kuwalipikadong regular ug mga kabataang botante nga makapatala aron makabotar sa piniliay sa sunod tuig.

Ang maong piniliay ipahigayon unta karong Oktubre 23, apan gi-oktaba sa Comelec sa Mayo 14, 2018, human gilagdaan ni Presidente Rodrigo Duterte ang Republic Act No. 10952.

Tinguha usab sa Comelec nga maka-parehistro pa ang mga kabataan nga mahimo nang makabotar sa sunod nga piniliay. (ecb/PIA7-Bohol)

=============

Taiwan, nihanyag og visa-free 

entry sa mga Pinoy sugod Nob. 1

TAGBILARAN CITY, Oct. 17 (PIA)--Mahimo nang mobisita sa Taiwan ang mga Pilipino nga walay visa sugod karong Nobyembre 1.

Gipahibalo sa Taipei Economic and Cultural Office (TECO) nga dili na kinahanglan og visa ang mga Pilipino nga magpabilin sa Taiwan hangtod sa 14 ka adlaw alang sa turismo, negosyo, pagbisita sa mga paryente o pagtambong og mga kalihokan.

“Philippine nationals who intend to visit the Republic of China (Taiwan) for the purpose of tourism, business, visiting relatives, attending functions or events can enjoy visa-free entry to Taiwan, ROC, for a duration of stay up to 14 days,” matud pa sa gipagawas nga pahayag sa TECO niadtong Lunes.

Molanat ang trial-period alang niining prebilehiyo hangtod sa Hulyo 31, 2018.

Tungod sa "One-China Policy," walay pormal nga diplomatikong kasiglabotan ang Manila ug Taipei. 

Apan bisan pa niini, napabilin gihapon ang relasyon sa Pilipinas ug Taiwan pinaagi sa TECO, nga nagsilbing de-facto embassy nila sa nasod. (ecb/PIA7-Bohol)