Ika 4 ka tuig sumad sa linog

Gipahi-uli nga simbahan sa 

Loay, Kapitolyo abuksan na

TAGBILARAN CITY, October 12 (PIA)--Duha ka mga proyekto nga gipundohan sa Nasudnong Kagamhanan ang buksan alang sa publiko sa sumad sa ika upat nga tuig sa linug niadtong Oktubre 15, 2013. 

Ang mga proyekto, mao ang malampusong pagpahiuli sa mga karaang simbahan ug estraktura nga giguba sa kusog nga linuog niadtong 2013.

Sa sumad sa adlaw sa linug, itugyan na sa National Historical Commission of the Philippines (NHCP) ang simbahan sa Santisima Trinidad sa Loay, human sa pagpahiuli niini ug sa mga nasakop sa iyang deklaradong complex sa Domingo pohon sa buntag. 

Giingong natukod niadtong sayo pa sa 1822, ang simbahan sa Loay nadeklara na nga Nasundong Kulturanhong Kabtangan (National Cultural Treasure), ug mamahimong maoy ikaduha nga simbahan sa Bohol nga ikatugyan sa NHCP sa lokal nga tinugyanan sa simbahan. 

Sa laing bahin, pagkahapon, himoon ang soft opening sa karaang Kapitolyo Probinsyal nga karon gikatugyan na sa National Museum (NM). 

Ang Kapitolyo Probinsyal, nga giingon natukod niadtong 1855, gikatugyan na sa Kagamhanang Probinsyal sa Bohol ngadto sa NM aron magastohan usab sa nasudnong kagamhanan ang pagpahiuli niini nagdto sa iyang karaang dagway ug porma. 

Ang Kapitolyo, nga himoon na nga museo sa NM dinhi sa Bohol gikadeklara nga mahinungdanong Kulturanhong Kabtangan (Important Cultural Property), ug gastohan sa gobernor ang pagpahiuli niini. 

Hinuon, matud ni NM Director Angel Bautista, sa sunod tuig pa pohon ang kompleto nga pagtugyan sa gipahiuli nga karaang gambalay nga ginama sa mga tinableyang bato, human mapahiluna na sa NM ang mga kabtangang gipanalipdan ug adto na tipigi didto. 

Matud ni Director Bautista, hepe sa NM Cultural properties Division ug Acting assistant Director, gitun-an og maayo sa NM ang pagpahiuli sa karaang Kapitolyo ug gibalik niini ang karaang dagway niini, lakip na ang hagdanan nga gibalhin kaniadto sa sentro ga bahin. 

Gikan sa karaang Kapitolyo, matukod ang labing menos 8 ka mga galerya, Museum shop, visitor services office, NM offices, courtyard, laboratory area, power room, quarters ug duha ka mga restrooms. 

Laing duha pa ka napahiuli nga strakturang karaan ang itugyan og balik sa mga tinugyanan sa NM sa lokal nga kagamhanan. 

Sa Lunes, Oktubre 16, itugyan sa NM ang napahiuli nga Bandelion Tower ngadto sa Balilihan samtang pagkaugman, Oktubre 17, adto na usab ang pagtugyan mahitabo sa napahiuli nga Punta Cruz Watchtower. 

Kining duha ka mga karaang tore nga bato nga apektado usab sa linog, parehas nga deklarado nga Important Cultural Property. 

Gani, dakong kalipay sa mga heritage workers ug mga parokyana sa Bohol nga sa wa damhang higayon, napahiuli pa gihapon ang nga karaang simbahan nga gilumpag sa linug. 

Karong mga tuiga, gihimo na usab sa kagamhanan nga prayoridad ang pag-apil sa mga komunidad sa paghukom sa dangatan sa ilang mga kabilin ug kapanulundan. (rahc/PIA-7/Bohol)

Milugwa ang bag-ong napahiuli nga dagway sa bongbong sa kanhi Kapitolyo sa Bohol human tun-i sa NM nga ingon diay niini ang ilawom sa palitada. Kini ang makita sa katawhan inig bukas sa Kapitolyo karong Domingo Oktubre 15. (rahc/PIA-7/Bohol)