15 ka oras nga brown-out

Karong Sabado, andaman

TAGBILARAN CITY, November 27 (PIA)—Mangandam alang sa 15 ug dili lamang 13 ka oras nga gikatakda nga pagkapakgang sa serbisyo sa sugang dagitab karong Sabado, Disyembre 2, 2017.

Kini subay sa labing bag-o nga kasayuran nga gipagawas sa National Grid Corporation of the Philippines (NGCP) human una na nilang gipagawas nga may 13 ka oras nga pagkapawong sa suga sa Disyembre 2.

Sa usa ka bag-ong pahibaw nga gipetsahag Nobyembre 28, gipahibaw sa NGCP ang bag-ong schedule sa pagkapalta sa serbisyo sa sugang dagitab dungan sa pagserbisyo sa pagmintinar sa 138 KV Maasin-Ubay Submarine cable. 

Inay magsugod sa alas 5 sa sayong buntag ngadto sa alas 6:00 sa sayong kagabhi-on, giuswag na kini sa alas 4:00 sa kaadlawon ngadto sa alas 7:00 sa gabii o 15 ka oras. 

Ang gipahibaw nga pagkapawong makaapektar sa tibuok lalawigan sa Bohol gawas lamang niadtong mga isla nga may serbisyong solar ug wama masumpay sa linya sa Leyte. 

Matud sa NGCP pinaagi si Division Head Octavio Briones, ang pagka-usab sa schedule tungod kay manginahanglan og mas taas nga panahon alang sa switching procedures.

Gawas sa pagserbisyo sa Ubay-Maasin 138 KV Submarine Cable, ang pagkapalta sa serbisyo sa koryente, dala na usab sa tinuig nga Preventive Maintenance sa Systems sa NGCP. 

Partikular nga serbisyohan sa pagmintinar anang nahisgutang adlawa mao ang Ubay 100 MVA Transformer, ang Corella 100 MVA Transformer, 15 MVAR Shunt Reactor, 138 KV ug 69 KV PCBs. 

Lahi usab ang trabaho nga ipahigayun sa pagmintinar sa linya sa 138KV Maasin-Ubay Submarine Cables, kauban na ang mga nakakabit nga high voltage equipment niini ug ang mga protective ug secondary devices niini, matud pa ni Engr Dino Nicolas Roxas, general manager sa Boheco 1 nga nagbase sa Macaas-Cabulijan Tubigon. 

Human kini makompleto, iagi pa usab ang fault clearance system sa entiro linya sa integrity testing, dugang ni Roxas. 

Tungod sa kadaghan sa substations nga iserbisyo nianang adlawa, ug sa kadaghan sa mga kalihukan nga dungan nga trabahoon, gipaabut nga medyo may kalangan gayud, pasabut sa NGCP. 

Dugang usab niini, gipasalig na sa mga Distribution Utilities nga ilang ipahiuli sa labing dali nga panahon ang koryent kon mahibalik na usab ang supply gikan sa NGCP, dungan usab sa pagpasabut nga ang pagserbisyo sa mga linya apil na sa pagpalig-on pa sa mga pasilidad sa NGCP aron mas makaserbisyo kini og maayo. (rahc/PIA-7/Bohol)