BISU, nakab-ot ang ika-3 pwesto sa 

2017 Civil Engineering Licensure Exam

TAGBILARAN, Nov. 24 (PIA)--Nakuha sa Bohol Island State University (BISU) Main Campus ang ikatulong dapit isip best performing school sa bag-o lang gipahigayon nga Civil Engineering Licensure Examination niadtong Nobyembre 11 ug 12.

Ang BISU-Main Campus nakakuha sa passing rate nga 87.04 percent.

Base sa resulta nga gipagawas sa Professional Regulation Commission (PRC), 47 sa 54 ka examinees gikan sa BISU ang mipasar sa maong licensure exam.

Ang BISU nga apil sa mga tunghaan nga adunay 50 o labaw pa ka examinees, nagsunod sa University of the Philippines-Diliman ug University of the Philippines-Los Baños nga nakakuha sa una ug ikaduhang dapit.

Kinatibuk-ang 113 gawas sa 116 examinees gikan sa UP-Diliman ang mipasar sa maong pasulit diin nakakuha ang maong tunghaan og 97.41 percent passing rate.

Samtang ang UP-Los Baños nakakuha og passing rate nga 96.65 percent diin 56 sa 58 nila ka examinees ang mipasar sa maong pasulit sa PRC.

Matud pa sa PRC, 6,075 sa 12,447 (48.81%) ang mipasar sa maong pasulit nga gipahigayon sa mga syudad sa Manila, Baguio, Cagayan de Oro, Cebu, Davao, Iloilo, Legaspi, Lucena, Tacloban, Tuguegarao ug Zamboanga. 

Ang resulta sa CE board exam opisyal nga gipagawas niadtong Nobyembre 21, 2017 o upat ka working days human sa katapusang adlaw sa maong exam. (ecb/PIA7-Bohol)