Driver’s license renewal office sa ICM, 

gibuksan og balik sa LTO; naglaraw

sa pagbutang og dugang buhatan sa 

kalungsoran

TAGBILARAN CITY, Nov. 24 (PIA)--Gibuksan og balik sa Land Transportation Office (LTO) niadtong Miyerkoles ang ilang Driver’s License Renewal Office sa Island City Mall (ICM) ning syudad, human kini gisirad-an sa niaging tuig human natapos ang ilang kontrata sa maong mall. 

Gipangunahan ni LTO-7 operations division chief, Joel Maloloy-on ang pag-inagurar inubanan sa mga kawani sa LTO-Tagbilaran District Office nga gipangunahan usab ni officer-in-charge Erwin Patalinghug.

Tungod niining kalamboan, ang publiko mahimo nang makapa-renew sa ilang driver’s licenses sa ICM branch ug sa LTO-Tagbilaran District Office.

Gibutyag ni Patalinghug nga ang renewal center for driver’s licenses sa ICM mogamit na sa Dermalog machine aron mapadali ang pag-proseso sa license renewals.

Gitakdang sugdan sa paggamit ang maong German-made equipment sa dili pa matapos ang tuig.

Samtang ang LTO-7 naglaraw sa pagdugang og duha pa ka buhatan nila dinhi sa lalawigan nga maoy ika-5 ug ika-6 nila nga branch sa Bohol. 

Gibutyag ni Maloloy-on nga nakadawat sila og mga requests ug proposals nga naghangyo sa pagbukas og dugang buhatan nila dinhi sa Bohol diin gi-konsiderar nila ang mga lungsod sa Tubigon ug Carmen isip mga bag-ong lokasyon. 

Apan gi-angkon usab ni Maloloy-on nga ang pagbutang og dugang buhatan mag-agad sa mando sa ilang ulohang buhatan diin mo-agi pa kini og taas nga proseso ug manginahanglan og dakong pondo.

Ang Bohol may upat ka LTO branches nga nahimutang sa syudad sa Tagbilaran, ICM, Jagna ug Talibon.

Samtang nag-plano usab ang LTO sa paglugway sa ilang office hours aron mahulipan ang ilang backlog sa mga nalangay nga proseso ilabi na sa issuance sa plastic driver’s license. (ecb/PIA7-Bohol)

Ang bag-o lang gibuksan og balik nga Driver’s License Renewal Office sa LTO sa Island City Mall (ICM) sa syudad sa Tagbilaran. (ecb/PIA7-Bohol)