Krimen sa Bohol misaka'g 3.4%

Aksidente sa dalan naka-angin 

TAGBILARAN CITY, November 21 (PIA)--Wala ra masapal sa kunhod sa index crimes ang pagtaas sa non index crimes sa Bohol, hinungdan nga sa buwan sa Octubre, natala sa Bohol Provincial Police Office sa Campo Dagohoy ang 3.4% nga pagtaas sa kaso sa mga krimen dinhi. 

Gikan sa 617 ka kaso nga natala isip total crime volume (TCV) sa Bohol sa Septembre, napun-an kini og 21 ka kaso sa buwan sa Octubre, hinungdan sa 3.4 nga kaso sa pagsaka sa TCV. 

Apan, ang pagta-as, dala sa pagdaghan sa mga aksidente sa kadalanan dala sa pagdanghag og pagpadagan sa mga tigmaneho sa mga sakyanan nga wala magmatngon sa mga balaod sa trapiko. 

Ang buwan sa Octubre mipatala sa 177 ka index crimes, o 21 ka kaso nga pagkunhod gikans a 198 ka kaso sa index crimes niadtong Septembre, padayag ni Police Superintendent Jonathan Satentes didto sa hiniusang tigum sa Provincial Peace and Order Council (PPOC) ug sa Provincial Anti Drug Abuse Council (PADAC) Nobyembre 16. 

Si Supt Satentes, kinsa maoy deputy chief of operations sa BPPO maoy mipahayag sa taho sa kampo Dagohoy sa ngalan ni PSSupt Felipe Natividad.

Ug inay naa na sa 419 unta ang kaso sa mga non-index crimes sa Bohol sa miaging buwan, nisaka kini ngadto na sa 461 sa buwan sa Oktubre 2017, dala sa dugang nga 42 ka kaso'ng natala sa mga police blotter sa mga estasyonan sa kapulisan sa tibuok Bohol, dugang ni Supt Satentes.

Hinuon, agi og pakonswelo sa mga Bol-anon, gidugang sa Kampo Dagohoy nga ang pagdaghan sa krimen dala sa Non-Index Crimes, dili anagy kabalak-an kat kini dala sa mas napamaayo nga lihok sa kapulisan batok sa kriminalidad. 

Partikular nga makapa-saka sa kaguol sa mga Bol-anon ang tataw nga pagtaas sa mga aksidente sa kadalanan. 

Ang aksidente sa kadalanan apil sa ihap sa mga krimen. 

Segun sa mga kasayuran nga nahakgop sa Provincial Intelligence Detection and Management Bureau (PIDMB) sa Kampo Dagohoy, gikan sa 214 ka aksidente nga natala niadtong Septembre, mikabat na sa 268 ka kaso ang nadusmog sa mga talaan sa Kampo sa buwan sa Oktubre.

Segun sa mga datus nga makuha sa mga aksidente sa kadalanan, 39 ka kaso niini ang nadisgrasya kay nagpaturatoy rag padagan nga wala magtan-aw sa sitwasyon. 

Lain nga 34 ka kaso sa mga disgrasya nahitabo tungod sa pugoso nga pag-overtake bisag wala sa lugar samtang naay 28 ka kaso sa disgrasya dala sa nagpataka lang og liko nga walay tarung nga pagpahibaw og pagsenyas, matud sa Kampo Dagohoy. 

Kon sumadahon, daghang kaso sa krimen sa Bohol dala sa mga tigmaneho nga walay disiplina, walay alamag sa mga balaod sa trapiko ug nagpaturatoy lang og padagan nga walay kabang-kaagan. (rahc/PIA-7/Bohol)

Misaka og 3.4% ang kaso sa mga krimen sa Bohol, apan kadaghanan niini, mga aksidente sa kadalanan dala sa mga danghag og way alamag nga tigmanehog sakyanan, segun sa mga datus nga gipaambit ni PSupt Jonathan Satentes nga gipadayag sa mga tigum sa PPOC. (rahc/PIA-7/Bohol)