Lalawigan sa Bohol ug 5 ka LGUs, 

nakakuha og Seal of Good Local Governance 

TAGBILARAN CITY, Nov. 13 (PIA)--Gitakdang pasidunggan ang lalawigan sa Bohol ug lima ka local government units sa probinsiya human nakuha niini ang Seal of Good Local Governance (SGLG) sa Department of Interior and Local Government (DILG).

Sa 81 ka lalawigan sa tibuok nasod, 28 lamang apil ang Bohol nga gantihan og SGLG.

Gawas sa probinsiya, apil usab ang mga lungsod sa Alicia, Bien Unido, Duero, Tubigon ug ang syudad sa Tagbilaran ang gitakdang gantihan og SGLG sa Nobyembre 27 sa Manila Hotel.

Matud pa ni DILG provincial director Ma. Lousella Lucino, ang mga mananaog gantihan og SGLG glass marker gikan sa DILG samtang nagkalain-laing ganting salapi ang gitakdang ipanghatag sa nagkalain-laing lokalidad.

Gidugang pa ni Lucino nga ang lalawigan sa Bohol gitakdang makadawat og P7 milyon samtang ang syudad sa Tagbilaran gitakdang makadawat og P5 milyon ug ang 4 ka lungsod usab makadawat og tag P3 milyon matag usa, pinaagi sa DILG Performance Challenge Fund.

Ikatulong higayon na kini sa lalawigan ug sa lungsod sa Alicia nga pasidunggan sa DILG og SGLG sukad niadtong tuig 2015, samtang labing unang higayon kini sa syudad sa Tagbilaran ug sa ubang LGU nga makadawat sa maong pasidungog.

Niadtong tuig 2016, ang mga lungsod sa Corella, Duero, Maribojoc, Talibon, Tubigon ug Trinidad gipasidunggan usab sa DILG og SGLG.

Samtang ang mga lungsod sa Danao, Loboc, Loon, Maribojoc, Panglao, San Miguel, Sierra-Bullones ug Talibon nakadawat usab sa maong pasidunggog niadtong tuig 2015. 

Ang SGLG usa ka tinuig nga pagpasidunggog ngadto sa mga LGUs nga nakasubay o nakatuman sa performance criteria sa nagkalain-laing key elements lakip na sa good financial housekeeping, disaster preparedness, social protection, business-friendliness ug competitiveness, environmental management, peace and order ug public safety. (ecb/PIA7-Bohol)

================

Pag-isyu og OEC sa mga bag-ong aplikante,

kasamtangang gi-suspenso sa DOLE

TAGBILARAN CITY, Nov. 13 (PIA)--Gilagdaan niadtong Biyernes ni Department of Labor and Employment (DOLE) Kalihim Silvestre Bello III ang Department Order No. 185 nga kasamtangang nagsuspenso sa pag-isyu og Overseas Employment Certificates (OEC) sa mga bag-ong aplikante. 

Epektibo na kini sugod karong adlalwa, Nobyembre 13 ug molanat taman sa Disyembre 1 ning tuig.

Gipasabot ni Bello nga tungod kini sa nagka-grabeng problema sa illegal recruitment nga angay masolusyonan sa buhatan.

Gidugang pa sa kalihim nga bisan may gibanabanang 75,000 ka mga bag-ong aplikante ang malangay sa ilang pag-biyahe sa ubang nasod aron mo-trabaho, giingong dili matupngan niini ang liboan pang Pilipino nga matabangan kun mapakgang ang mga illegal recruiter.

Apan gitataw sa DOLE nga wala naapil sa D.O. ang mga trabahanteng gikuha sa international organizations ug miyembro sa diplomatic corps, mga miyembro sa royal family ug sea- based recruitment agencies.

Unang gibutyag ni acting Philippine Overseas Employment Administration (POEA) Admin Usec. Olalia nga usa sa mga kasong nataho kanila ang pagpa-meke sa OEC sa mga direct hire nga posibleng gilambigitan sa pipila ka opisyal ug empleyado sa POEA.

Maong tungod niini, pa-imbestigahan ang mga opisyal ug kawani sa ahensya ug kun mapamatud-ang nalambigit sa ilegal nga buhat, tangtangon kini sa pwesto.

Kinse ka adlaw molanat ang suspensyon, apan mahimo pa kining i-uswag hangtod dili masulbad ang halapad nga operasyon sa illegal recruitment sa nasod. (ecb/PIA7-Bohol)