Mga empleyado sa gobyerno,

may umento sugod Enero 2018

TAGBILARAN CITY, Nov. 23 (PIA)--Maayong balita alang sa mga empleyado sa gobyerno sa pagsulod sa tuig 2018 tungod sa implementasyon sa ikatulo sa upat nga tranches nga salary increase alang sa mga kawani sa gobyerno ubos sa Salary Standardization Law (SSL).

Matud pa sa Department of Budget and Management, mokabat sa P24 bilyon ang gigahin alang sa dugang suholan sa mga government employees nga nahisulod sa 2018 proposed budget.

Apil sa makapahimos niining salary increase si Presidente Rodrigo Duterte nga mokabat na sa P298,000 ang iyang madawat nga binuwang sweldo gikan sa kasamtangang P222,238 monthly salary niini o may dugang nga 34.1 percent increase.

Gibanabanang naa sa 1.2 milyong kawani sa gobyerno ang makapahimos sa 3rd tranche sa salary hike.

Apil sa maong umento sa suholan ang mga empleyado sa State Universities and Colleges (SUCs), mga empleyado sa government owned and controlled corporations (GOCCs) nga nalakip sa compensation and position classification system ubos sa Republic Act number 6758, mga kawani sa lokal nga kagamhanan ug mga barangay personnel nga nagdawat og monthly honoraria. (ecb/PIA7-Bohol)

===============

Listahan sa mga gidili’ng pabuto,

gipagawas sa PNP

TAGBILARAN, Nov. 23 (PIA)--Hugot nang ipatuman sa Philippine National Police (PNP) ang Executive Order No. 28 nga epektibo na karong tuig.

Enero ning tuig sa dihang gilagdaan ni Presidente Rodrigo Duterte ang EO 28 nga mag-regulate sa paggamit sa mga pabuto o firecrackers ug mga pyrotechnic sa tibuok nasod.

Nakalatid sa maong EO nga tanang gitugotang pabuto mahimo lamang gamiton sa mga designated firework display area nga gitakda sa mga local government units (LGUs).

Samtang ang mga gitugotang mga pyrotechnic, mahimong gamiton gawas sa firework designated area. 

Mao nga pagsulod sa holiday season, hugot nga bantayan sa PNP ang pagpatuman niini.

Kalabot niini, gipagawas sa PNP ang listahan sa mga gidiling pabuto. Kini mao ang mga adunay pulbora nga molapas sa point 2 grams o kapareho sa 1.3 ka kutsaritang gun powder.

Apil na niini ang super lolo, whistlebomb, goodbye earth, atomic big triangulo, piccolo, judahs belt ug uban pang kusog nga pabuto nga gina-angkat pa sa ubang nasod. 

Bawal usab ang mga pabuto nga adunay mga kemikal nga makadaot sa kahimsog sama sa watusi. (ecb/PIA7-Bohol)