2018 nat’l budget ug tax reform 

bill, gilagdaan na ni Duterte

MANILA, Dec. 20 (PIA)--Gilagdaan na ni Presidente Rodrigo Duterte ang P3.767 trilyon nga 2018 General Appropriation Act (GAA). 

“2018 budget will fund salary increases for police, military, fund free college tuition, other social programs,” matud pa sa Presidente.

Nisaka og 12.4 porsiyento ang national budget alang sa 2018 kun itandi sa kasamtangang tuig.

Dakong parte sa nasudnong budget ang gigahin alang sa imprastraktura, edukasyon ug pondo alang sa mga lokal nga kagamhanan.

Human niini, gilagdaan usab ni Duterte ang kontrobersiyal nga Republic Act 10963 o ang Tax Reform for Acceleration and Inclusion (TRAIN) Bill.

Ubos sa TRAIN, tanang nagdawat og sweldo nga dili mo-taas sa P250,000 matag tuig, tax exempt na ug modaku na ang ilang take-home pay.

Matud pa sa Presidente nga gipaabot nga mokabat sa P130 bilyon revenues ang mosulod dayon sa nasod sa pagpatuman sa bag-ong tax reform package.

“This (TRAIN) is the administration’s biggest Christmas gift to the Filipino people,” matud pa ni Duterte. 

Gamiton usab ang pondo alang sa mga proyektong pang-imprastraktura sa gobyerno ubos sa Build Build Build program sa administrasyon.

Apan kaabin usab niini ang pagsaka sa buhis sa mga tam-is nga ilimnon sama sa mga soda ug 3-in-1 coffee, apil na usab sa mga produktong petrolyo, coal, cosmetics ug mga sakyanan. 

Una nang gipasalig sa Malakanyang nga gastuhon og sakto sa administrasyon ang matag sentimo sa national budget. (ecb/PIA7-Bohol)