Mga daang bills, mahimong paalisdan 

taman lamang karong Disyembre 29 

TAGBILARAN CITY, Dec. 27 (PIA)--Hangtod karong Disyembre 29 na lamang mahimong paalisdan ang mga daang salaping papel sa mga buhatan sa Bangko Sentral ng Pilipinas (BSP) Cash Departments ug sa ilang mga branches ug rehiyonal nga mga buhatan. 

Ang mga salaping papel nga alisdanan na mao ang mga New Design Series (NDS) banknotes nga gihimo niadtong tuig 1985. 

Alisdan kini og New Generation Currency (NGC) nga maoy gigamit na karon. 

Ang unang deadline sa pagpa-ilis sa NDS gitakda niadtong Disyembre 31, 2016. 

Niadtong Hulyo 1, 2017 na lamang mahimong ibayad ang mga NDS apan mahimo pa kining paalisdan sa mga buhatan sa BSP hangtod sa Disyembre 29. 

Kagahapon, gibuksan ang mga cash department sa BSP aron modawat sa mga magpa-ilis sa mga daang salaping papel. 

Kalabot niini, nanawagan ang BSP sa publiko nga kun may gitaguan pang mga daang bills, paalisdan na unta kini dayon ug dili na paaboton pa ang deadline sa Disyembre 29. (ecb/PIA7-Bohol) 

==============

Hugot nga seguridad sa Bohol,

ipadayon hangtod Bag-ong Tuig

TAGBILARAN CITY, Dec. 27 (PIA)--Ipadayon gihapon ang pagpatuman sa hugot nga seguridad sa lalawigan sa Bohol hangtod sa pagsugat sa Bag-ong Tuig. 

Kini, bisan pa sa giingong “generally peaceful” kun malinawon sa kinatibuk-an ang pagsaulog sa Pasko sa lalawigan, matud pa sa Bohol Provincial Police Office (BPPO). 

Si BPPO Chief, Sr. Supt Felipe Natividad mipasalig sa publiko nga ang pwersa sa kapilosan magpabiling alerto sa pagresponde ug pagtubag sa bisan unsang ‘distress calls’ ilabi na sa mga malls ug terminal sa mga bus, pantalan ug airport nga dugokonon sa mga tawo karong mga panahona. 

Gi-awhag usab ni Natividad ang publiko nga magpabiling magbinantayon batok sa bisan unsang matang sa krimen. 

Gibalik usab niini ang panawagan sa BPPO sa mga residente nga dili biyaan ang ilang mga balay nga walay mabilin o siguradohong hingpit ang seguridad aron malikay sa mga kriminal nga mopahimos ning panahon sa Pasko ug Bag-ong Tuig. 

Ning bag-o lang, ang Philippine National Police (PNP) nitugot sa ilang mga personnel sa pagsaulog sa Pasko kauban sa ilang pamilya apan gibutang sa ‘on-call’ aron maka-responde dayon sa mga emergencies. 

Bisan sa suspension of offensive police operations (SOPO) batok sa New People’s Army (NPA) karong Pasko ug Bag-ong Tuig, si PNP chief Ronald "Bato" dela Rosa nimando niadtong Sabado sa mga police units nga magpabilin sa ‘high alert’ status. 

Ang deklarasyon sa SOPO epektibo sugod niadtong alas 6 sa gabii sa Disyembre 23 taman alas 6 sa gabii sa Disyembre 26; ug gikan alas 6 sa gabii sa Disyembre 30 taman alas 6 sa gabii sa Enero 2. (ecb/PIA7-Bohol)