Panawagan sa DOH sa mga ginikanan:

ilayo ang mga bata sa mga pabuto

MANILA, Dec. 28 (PIA)--Samtang nagkaduol na ang pagsugat sa Bag-ong Tuig, subling nagpahinumdom ang Department of Health (DOH) sa mga maguwang ilabi na sa mga ginikanan batok sa pagtugot sa mga bata sa paggamit og pabuto.

Nanawagan si DOH Kalihim Francisco Duque III sa mga ginikanan nga bantayan gayud og maayo ang ilang mga anak aron malikayan ang mga firecracker-related injuries, ug kun mahimo, dili pagamiton ang mga bata og mga pabuto.

Matud pa ni Duque, kaugmaon ang nakataya niini ug dili na mabalik pa ang epekto kun madisgrasya tungod sa pagpabuto.

Giingong maglisod na gayud ang mga bata sa pagtuon ug mahimong produktibo sa ilang kinabuhi.

Mao usab kini ang pahinumdom sa kalihim sa mga mag-inom nga maghubog samtang magpabuto.

Matud pa ni Duque nga basin sa grabeng kahubog, imbes nga pabuto, ang sigarilyo o ang gigamit nga pangdaig ang malabay ug mabilin sa kamot ang gidaigang pabuto nga posibleng mahimong kinaingnan sa disgrasya.

Dugang pa sa kalihim, lisud mangita og panginabuhian kun wala na’y mga kamot.

Tungod niini, nangutana ang kalihim sa mga hilig magpabuto: “Unsaon man ang dinaliang kalipay hulip sa kaugmaon ug sa imong pamilya?”

Apan alang sa mga dili gayud mapugngan sa pagpabuto, gitambagan na lang ni Duque nga kun masamdan tungod sa pagpabuto, hugasan dayon ang samad gamit ang limpyong tubig hangtod sa mawala ang tanang makitang hugaw o pulbura.

Sunod niini, angay moadto dayon sa tambalanan ma-gamay man o dako ang samad.

Pasagdan na lamang ang mga doktor nga magdesisyon sa kun unsa ang angay himuon sa samad aron malikayang mo-grabe sa impeksyon. (ecb/PIA7-Bohol)

=====================

Mga fireworks safety tips 

nga angay hinumdoman

TAGBILARAN CITY, Dec. 28 (PIA)--Gi-awhag sa Department of Health (DOH) ang publiko nga makighiusa sa fireworks display sa ilang mga lugar aron malikayan ang firecracker-related injuries.

Kalabot niini, nipagawas ang DOH sa pakigtambayayong sa Philippine Information Agency (PIA) sa pipila ka mga firework safety tips nga angay hinumdoman sa tanan.

Una na niini ang dili pagpalit og pabuto nga walay nakabutang nga pangalan sa kumpanyang naghimo o manufacturer niini.

Ikaduha, angay bantayan ang mga bata kun mogamit og mga pabuto. Dili sila pasagdang mag-inusara sa paggamit sa bisan unsang fireworks o pabuto.

Ikatulo, dili angay gamitong panghadlok, pangbugal-bugal o duwaan ang mga pabuto tungod kay mahimo kining tinubdan sa aksidente.

Ikaupat, mas maayo kun likayan ang paggamit og pabuto. Daghang ubang paagi aron magsaba-saba matag bag-ong tuig sama sa paggamit og torotot, air horns ug uban pa.

Ug dili gayud poniton ang mga nabasa o mipalyar nga mga pabuto tungod kay mahimo kining mobuto og kalit samtang gigunitan. 

Kun mahimo, dili na lang mogamit og pabuto, PVC boga ug watusi sa pagsugat sa Bag-ong Tuig. (ecb/PIA7-Bohol)