Voters’ registration, dili na

i-uswag pa sa COMELEC

TAGBILARAN CITY, Nov. 29 (PIA)--Hangtod Huwebes, Nobyembre 30 na lamang mahimong magparehistro ang mga gustong mobotar alang sa piniliay sa Barangay ug Sangguniang Kabataan sa Mayo 2018.

Matud pa sa Commission on Elections (COMELEC), wala sila’y planong i-uswag pa ang voter’s registration period.

Matud pa sa tigpamaba sa COMELEC nga si Atty. James Jimenez, dugay nang panahon nga nag-abli ang voter’s registration mao nga wala na nila hisgoti ang pag-uswag niini.

Si Jimenez nagkanayon nga gibuksan sa COMELEC ang voter’s registration niadtong Hulyo 15 hangtod 30, 2016 ug Nobyembre 7, 2016 hangtod Abril 29, 2017 sa wala pa kini gibuksan og balik sugod niadtong Nobyembre 6 ning tuig mao nga igo na ang panahon nga makaparehistro ang mga botante.

Gi-awhag ni Jimenez ang mga wala pa nakaparehistro sa pag-adto na sa mga lokal nga buhatan sa COMELEC ug pahimoslan ang nahabiling duha ka adlaw sa registration.

Gibutyag sa COMELEC nga naa sa 500,000 ka botante na ang nakaparehistro sugod gibuksan ang ilang buhatan karong buwan. (ecb/PIA7-Bohol)