BFAR mohatag og semilya

sa bangus sa magpunong

TAGBILARAN CITY, January 18, (PIA)--Sa nagkanihit nga supply sa isda ug sa nagkamahal nga presyo niini, aghat sa Bureau of Fisheries and Aquatic Resources (BFAR): sagup sa fishpen o fish cage o pagbuhat og punong (fishpond). 

Gawas nga makatagamtam kag kahigayunan nga maka-isda sa bisan unsang panahon nga buot mong mokaon og isda, mahimo pa nga makwarta sa libre nga teknolohiya nga makuha gikan sa kagamhanan. 

Gisugyot sa duha ka aqua technologists sa BFAR Central Visayas Multi Species Nursery Demonstration and Training Center sa Bentig Calape, nga kon mosagup sa fishpen, cage o punong, mahimong makapangayo og libre nga semilya sa bangus gikan sa ilang buhatan. 

Sila Ma. Rocile Angela Josol and Jonaren Lafuente, nga nakastation sa Central Visayas Multi-Species Nursery, Demonstration and Training Center (CVMSNDC), mipaibog sa ilang 25 mil ka semilya sa bangus nga libre ngadto sa labing una nga mosagup sa teknolohiya. 

Hinuon, kinahanglan pa nga matan-aw sa BFAR ang lugar nga himoan sa fish cage, fish pen o punong aron masukod ang kapasidad niini sa produksyon ug kon mabuhi ba ang isda og mapadagko sa natumbok nga lugar. 

Kinahanglan lamang nga ikapahibaw sa BFAR Provincial Fisheries Office pinaagi ni Leo Bongalos ang laraw sa pagpadagko sa isda sa cage o pen o sa punong aron mapadalhan og inspecting team. 

Gidugang ni Josol ug Lafuente nga ang ilang pasilidad sa Bentig Calape makatabang usab sa pagbansay sa mga magdumala sa cage o pen o sa punong aron makat-on unsaon pag buhi sa isda ug sa pag-amoma niini aron mapatambok. 

Mokabat ngadto sa 25,000 ka semilya sa bangus ang mahimong ikahatag sa BFAR aron makatabang sa pagdugang sa supply samtang namatikdan nga may pagnihit gayud sa supply sa isda ning panahon sa tingtugnaw. 

Segun sa mga pagtuon, sa panahon sa tingtugnaw, ang mga isda nga sarang magdaghan kon magpakuha, mopalawod og maayo aron moadto sa mga init nga tubig hinungdan nga nihit ang kuha sa mga baling og pokot. 

Kini usab maoy usa sa mga gitumbok nga hinungdan nga saa kakuwang sa supply, may namatikdang pagsaka sa presyo sa isda. (rahc/PIA-7/Bohol)

Libreng tabang sa BFAR pinaagi sa CVMSNDTC ngadto sa mga makadesisyon nga maghimog fish pens o fish cage o punong aron makatabang sa pagpadaghan sa supply sa isda gisaad, ngalangkob sa libreng semilya yg pagkat-on sa teknolohiya sa pagpatubo og pagpatambok sa isda. (rahc/PIA-7/Bohol)