DA magdala dinhi og 5000

Ka mga baka nga girolando

TAGBILARAN CITY, January 7 (PIA)—Tungod kay medyo dili kaayo haum ang mga gatasan nga baka nga gikan sa New Zealand tungod kay init ang Pilipinas, gilaraw sa Department of Agriculture nga ipasulod sa Bohol ang 5,000 ka baka nga gikan sa halos susamag klima dinhi.

Gipaglantawan na sa DA ang nga baka nga “girolado” nga gikan sa Brazil, nga maoy unang dakung lakang sa kagamhanan sa pag-paduol sa Bohol sa damgo niining himoon ang lalawigan nga Dairy Capital sa nasud.

Gibutyag ni Gobernador Edgar Chatto atul sa iyang pagpanguna sa pagbukas sa Dairy Box sa Island City Mall nga kasamtangan na nga gipailawom sa kwarantina ang mga Brazilian nga baka nga dad-on dinhi sa Bohol.

Kini aron pagseguro nga walay madala nga mga sakit ang unang hugna sa mga baka nga dad-on sa Pilipinas ug buhi-an sa 3,000 ektaryas nga ranchohan nga gipanag-iya sa DA sa Ubay.

Una na nga nagpahibaw ang mga nagbuhi og baka sa nasud sa ilang kahingawa kay basin og may baka nga magdala sa gikalisangan nga “foot and mouth disease,” nga makaapekto na hinuon sa kahimtang sa nasud.

Ang Pilipinas nagpabilin pa gihapon nga FMD-Free samtang may mga lugar sa Brazil na nakasinati sa sakit.

Hinuon, ang girolando nga mga baka, mas daghan pa og gatas kay sa mga nagkadaiyang matang sab aka, ug mas makalahutay kini sa kahimtang sa mas init nga panahon.

Kasagarang mga baka nga nia sa Ubay sa National Dairy Authority Multiplier farm, mga gikan sa New Zealand, mogatas man apan dagway og kuwang gayud kon itandi sa ikahatag sa girolando.

Ang mga baka nga mangabut, pasanayon tungod kay hangtud nga kini manganak, dili man mogatas, matud pa sa NDA.

Ang mga nati kon modagko na, mahimong paalimahan sa mga mag-uuma kinsa tudlo-an usab unsaon sa pag-gatas ug sa pag-ani niini.

Matud pa, human sa pipila ka pagpanganak sa baka nga gipa-alimahan sa kagamhanan, mahimo kining panag-iyahon na sa mag-uuma human siya makapuli na sab aka pinaagi sa nati niini.

Kon mahidangat na ang kinatibuk-ang 5000 ka bakang girolando dinhi, mahimong kaya sa Bohol ang pag-ani sa 22 milyones ka litro nga gatas sa matag tuig, nga mahimong makapakunhod na sa nasudnong pagsalig sa imported nga gatas, segun pa sa DA. (rahc/PIA-7/Bohol)