Linawas nga pag-awit sa

Nasudnong Awit ra gyud

TAGBILARAN CITY, January 7 (PIA)—Kon makalabang sa ikatulo ug katapusang pagbasa, mahimo na nga manubag ang mga tigpasiugda og kalingawan kon dili linawas nga kantahon ang Nasudnong Awit o Lupang Hinirang.

Gani, kon ipatugtog man ugaling nga inubanan sa projection, kinahanglang kini dili magpakita sa bisan unsang talan-awaon kon dili ang nasudnong bandila lamang nga nagkayab o nagpundo.

Kini maoy unod sa gisugyot nga Ordinance No. 007-2017 nga nagmandu sa tanang buhatan sa kagamhanan, ahensya, local nga kagamhanan, mga eskwelahan, ospital ug institusyon nga dili na gamiton ang audio visual presentation isip background samtang nag-awit sa himno gawas kon ang salida, ang bandila lamang.

Ang ordinansa nga gipanginahanan ni Board Member Kristine Alexie B. Tutor ug gisponsoran nila ni BM Gloria B. Gementiza, Ricky B. Masamayor ug Jade A. Bautista, gikonsulta na sa Center for Culture and the Arts Development sa buhatan sa Gobernador, sa wala pa mapanday ang ordinansa sa unang pagbasa.

Atul sa ikaduhang pagbasa niini, gibutyag usab ni BM Gementiza nga sa ilang pagkonsulta sa National Historical Commission of the Philippines (NHCP) ug midason usab ang ahensya nga wala pay nagpanday og balaod nga nagdili sa pag-awit sa nasudnong awit nga abagan sa audio visual presentations.

Dugang pa, matud sa NHCP pinaagi ni Acting Executive Director Ludivico Baduy sa iyang suwat pinitsahan Disyembre 12, 2017 nga nahisakop sa gahum sa Sangguninag Panlalawigan nga magpasupot og ingon nianang ordinansa.

Tungod niadto, napadayon ang pagbasa sa ikaduhang higayon ang balaodnon.

Subay sa giduso nga ordinansa, nabatbat nga ang bisan kinsang institusyon nga makalapas, mahimong hatagan una sa stern warning, sa dili pa kamultahan og P2 ka libo ug P3 ka libo sa sunod nga kalapasan.

Gipasabut usab sa mga nagduso sa balaodnon nga manubag gayud ang mga nagpasiugda sa kalingawan kon ang operator magpataka og pasalida sa nasudnong awit nga misupak sa balaodnon, subay sa doktrina sa command responsibility.

Ipadayon ang ikatulo og katapusang pag basa sa ordinansa sa dili pa kini mahipno nga usa n aka balaod, subay usab sa gisunod nga patakaran. (rahc/PIA-7/Bohol)