Media ug information literacy, 

epektibong pangbatok sa fake news – PCOO

MANILA, Enero 30 (PIA)--Paghatag og saktong impormasyon kalabot sa mga nahitabo sa nasod ug kun unsa ang ginahimo sa gobyerno alang sa mga lungsoranon.

Kini matud pa ni Presidential Communications Operations Office (PCOO) Kalihim Martin Andanar ang labing epektibong paagi aron batokan ang fake news.

Sa iyang pag-atubang sa pagdungog sa Senado sa hisgotanan kalabot sa fake news, gitumbok ni Andanar ang kamahinungdanon sa media ug information literacy nga angay nagkahiusang adbokasiya sa gobyerno, academe, private media organizations, social media platform providers ug sa komunidad.

Gibutyag pa ni Andanar ang nasugdan nang programa sa PCOO alang sa edukasyon sa publiko kalabot sa paghimong mabinantayon ug responsableng information users ug giingong masaligon siya nga suportahan kini sa lehislatura.

Gitumbok usab sa Kalihim nga gawas sa Revised Penal Code, mahimo usab magamit sa mga na-agrabyado ang Republic Act 10175 o Cybercrime Act of 2012 aron mapasakaan og kaso ang mga nagpakatap og fake news

Matud pa ni Andanar nga welcome development sa Palasyo ang pagdungog sa Senado aron makapangita pa og posibleng lehislasyon aron mapakgang ang fake news

Sa parte sa administrasyon, giingong ginahimo ang tanan sa gobyerno aron makahatod og sakto ug tukmang balita, apil na ang pagpa-ugmad sa pasilidad sa TV ug Radio Network sa gobyerno bisan ang online site aron makahatod og saktong balita nga maoy nag-inusarang armas aron mabatokan ang fake news. (ecb/PIA7-Bohol)

==============

‘Oplan Tokhang’ nga may mga kausaban,

gilusad og balik sa Bohol

TAGBILARAN CITY, Enero 30 (PIA)--Ang kontrobersyal nga kampanya batok sa ilegal nga droga nga “Oplan Tokhang” sa Philippine National Police (PNP) opisyal nang gibalik sa tibuok nasod kagahapon apil na dinhi sa lalawigan sa Bohol human kini gipahunong niadtong Oktubre sa niaging tuig.

Gipahibalo ni Bohol Provincial Police Office (BPPO) Director SSupt. Angeles Geñorga Jr. atol sa gipahigayong Provincial Peace and Order Council kagahapon nga gilusad og balik sa kapolisan ang maong kampanya batok sa ilegal nga droga apan may mga kausaban na kini.

Matud pa ni Geñorga, ang ‘Oplan Tokhang’ ipahigayon na gikan Lunes taman Biyernes, sa mga oras nga gikan alas 8 sa buntag taman alas 5 sa hapon lamang.

Ang operasyon nga nanginahanglan sa mga awtoridad sa pagbisita sa mga drug suspects sa ilang mga panimalay ug pagkumbinser kanila nga undangon na ang ilang pagkalambgit sa negosyo sa ilegal nga droga apan dili kini ipamugos kanila, pasabot ni Geñorga.

Giingong gimanduan usab ang kapolisan sa paggukod sa mga gi-alegar nga drug personalities nga modagan sa panahon sa pag-implementar sa kampanya.

Gimanduan ang kapolisan sa pag-estorya sa pamilya sa mga suspetsado sa mga higayong ang gituyuan sa operasyon modagan o wala sa ilang panimalay.

Gipasidan-an na daan sa Kampo Crame ang mga miyembro sa “Tokhang” teams nga tangtangon sila sa serbisyo kun mapamatud-ang nalambigit sa anomaliya kalabot sa operasyon.

Susamang pasidaan usab ang gihatag sa mga chiefs of police ug bisan sa mga regional directors kun may pamatud-an sa mga isang-at nga reklamo.

Una nang gi-angkon ni PNP Chief Ronald “Bato” Dela Rosa nga wala nahimong perpekto ang pagpatuman sa orihinal nga intensyon sa ‘Oplan Tokhang’ niadtong una kining gipatuman mao nga may mga kausaban na kini.

Ang ‘Oplan Tokhang’ nga gilusad niadtong Hulyo 1, 2016, gipa-undang human gibalhin sa Malakanyang ang tanang anti-drugs operations sa hurisdiksiyon sa Philippine Drug Enforcement Agency (PDEA). (ecb/PIA7-Bohol)