Plastic nga 5-ka tuig nga lisensya

pagmaneho, makuha na sa Bohol

TAGBILARAN CITY, January 25 (PIA)—Nahuman gilayon sa 58 segundos.

Sulod sa susamang higayon, nakuha ni City Mayor John Geesnell Yap II ang iyang plastic nga lisensya nga valid sa 5 na ka tuig.

Hinuon, matud ni Land Transportation Office (LTO) Information Officer Florecio Balazuela, kinatibuk-ang 5 minutos ang nagasto nga oras sa usa ka card tungod kay mao pa lang usab ang pag-encode sa information sa bag-ong kahatagan sa print-out.

Nangabut na ang bag-ong mga makina nga misagop sa German technology, DermaLog ang mga bag-ong makina sa LTO Tagbilaran District office, matud pa ni LTO Assistant Secretary Edgar Galvante.

Kini samtang gitambongan mismo ni LTO Asec Edgar Galvante, LTO-7 RD Vic Caindic, ARD Alita Pulgo, mga hepe sa LTO Central Office ug pipila la nga RDs ug ARDs sa silingang mga rehiyon ang pag roll out sa pagprinta sa plastic nga lisensya sa pagmaneho, dinhi sa TLO Tagbilaran City District.

Si Asec Galvante personal nga mitunol sa mga lisensya nila ni City Mayor Yap, Balilihan Mayor Pureza Chatto, Cortes Mayor Lynn Iven Lim, Acting Provincial Administrator Mitchell John Boiser, Media personalities Dave Responte, Jun Gutierrez, Allen Doydora, Sofonias Narisma ug pipila pa ka mga pribadong indibidwal.

Kahinumduman nga gilagdaan ni Presidente Rodrigo Duterte ang Republic Act 10930 nga nag-amendar sa Republic Act 4136 o Traffic Code of the Philippines, nga karon mahimo na nga valid sa 5 ka tuig.

Sugod niadtong Agosto 2017, nagsugod na ang LTO sa pagpanghatag sa mga lisensya nga naa na sa 5 ka tuig ngadto sa tanang mihimo og renewals human sa Agosto nga pagkaepektibo sa balaod.

Gani, agi og paghatag og dugang pahalipay sa mga driver nga makalabang sa 5 ka tuig nga walay mga violations sa balaod sa LTO, mahimo nga sa sunod nga renewals, ang plastic nga lisensya nga ihatag, alang na sa sunod nga napulo ka tuig sa dili pa i-renew.

Apan, sa Bohol, tungod sa kanhi gireklamong kahinay sa internet connection, wala gayud mahimo ang pagpa-imprinta sa mga plastic cards, tungod kay kini nagkinahanglan sa mas kusog pa sa 5 megabytes per second (mbps) nga kasamtangang data connection sa LTO Tagbilaran Bohol, matud ni Balazuela.

Karon, matud ni LTO Bohol Registrar Erwin Patalinghug, sobra na sa gikinahanglan gikusgon ang nasupply sa LTO, igo na nga makagamit sa internet intensive nga pagprinta. (rahc/PIA-7/Bohol)