Procurement activities sa mga ahensiya 

sa gobyerno, tutokan sa Malakanyang

MANILA, Enero 31 (PIA)--Gusto sa Malakanyang nga matutokan ang procurement activities sa mga ahensiya sa gobyerno.

Base sa Memorandum Circular Number 39 nga gilagdaan ni Executive Secretary Salvador Medialdea niadtong Enero 26, gimando niini sa mga national government agencies, government owned and controlled corporations (GOCCs), state universities ug colleges ug sa local government units nga moduso og report sa Office of the President sa gihimong fund transfer niini sa Department of Budget and Management – Procurement Service.

Tuyo niining ma-monitor ang procurement sa mga supplies, equipment ug infrastructure projects nga gihimo sa niaging tuig.

Gihatagan lamang og taman Marso 31 ang mga ahensiya sa gobyerno sa pagsunod sa maong kamanduan. (ecb/PIA7-Bohol)

=============

Bayronon pagkuha og Dokumento sa PH 

Statistics Authority usbawan sugod Peb. 2 

TAGBILARAN CITY, Enero 31 (PIA)-- Ang Philippine Statistics Authority (PSA) kanhi National Statistics Office (NSO) mipahibalo ngadto sa publiko nga dunay dugang bayronon sa mga dokumentong i-request sa ilang buhatan sama sa birth certificate, marriage certificate, death certificate ug uban pa.

Matud pa sa gipagawas nga pahibalo sa PSA, sugod Pebrero 2, may kinse (P15.00) pesos nga dugang singil nga bayronon sa matag opisyal nga dokumentong ilang ipagawas.

Kini matud pa bunga sa epekto sa bag-ong gipatuman nga Tax Reform for Acceleration and Inclusion Law (TRAIN) Law.

Ubos sa moang balaod, may dugang sa bayarang documentary stamp tax sa publiko sa matag dokumento.

Tungod niini, gikan sa kanhi P140 pesos, mahimo nang P155 ang bayronon sa birth certificate, marriage certificate, death certificate ug sa mga authentication.

Samtang, mahimo nang P210 ang bayad sa Certificate of No Marriage (Cenomar) gikan sa kanhi P195 lamang sugod karong Pebrero 2. (ecb/PIA7-Bohol)

===============

Chatto, nanawagan sa mga LGUs 

sa pagpanalipod sa kadagatan

TAGBILARAN CITY, Enero 31 (PIA)--Nanawagan si Gob. Edgar Chatto sa mga local government units sa mga coastal areas ning lalawigan nga ipatuman ang mga lagda sa paghatag og mga permits ngadto sa mga establisamento ug uban pang mga ahensya nga may kalabotan sa paglabay sa basura.

Kini tungod sa giingong coliform contamination sa kabaybayonan sa Alona Beach area sa lungsod sa Panglao, base na usab sa report gikan sa Department of Environment and Natural Resources (DENR).

“Dako man na kaayo nga concern tungod kay ato man gyud panalipdan atong kadagatan. Mao man nay importante,” matud pa ni Chatto.

Gibutyag sa gobernador nga gihatagan og kopya sa DENR ang kagamhanang probinsiyal sa resulta sa updating sa status sa coliform contamination sa kadagatan sa Panglao, ilabi na dapit sa Alona Beach.

Matud pa ni Chatto nga gi-ebalwar na sa kagamhanang probinyal ang maong report.

Gipasabot sa gobernador nga bisan migawas sa moang DENR report ang pagkunhod sa coliform contamination level sa tubig-dagat sa Alona area sa Panglao kun itandi sa resulta sa finding sa pagsulod ning tuig, angay i-konsiderer ang ‘sea current’ ug kini nagpasabot nga posibleng may nagkalain-laing ‘trend’ sa findings sa ubang panahon sa tuig.

“Pero ang the fact is naay ilang finding. So, kinahanglan nga aksyonan gyud na dayon,” pagtumbok pa ni Chatto.

Kalabot sa coliform contamination, gibutyag sa gobernador nga gimanduan niya ang hingtungdang lokal nga kagamhanan sa pag-implementar sa findings sa DENR.

Gitumbok ni Chatto nga ilabi na karon nga ting-renew man sa mga permits, karon maoy panahon nga kinahanglan ang mga LGUs mogamit sa ilahang gitawag nga police power sa pagpatuman sa lagda nga naa sa coastal areas. 

Giingong importanteng mangita og solusyon ang mga LGUs ug ang kagamhanang probinsiyal andam usab mo-abag sa mga LGUs. (ecb/PIA7-Bohol)