Asukar para sa may diabetes 

magpataas sa bili sa lubi-PCA 

TAGBILARAN CITY, February 8 (PIA)--Dala sa pagka-ulipon sa mga mag-uuma sa lubi nga ang presyo gidiktar sa international markets nga nakapordoy sa magkokopras, gipang-aghat sa goyerno ang paglingi sa mga mag-uuma sa mga by-products, sama sa asukar sa lubi. 

Ang asukar sa lubi (coconut sugar) makuha gikan sa sinanggot nga himoonon og tuba nga wa pay tungog. 

Kini, matud ni Philippine Coconut Authority (PCA) manager Emiliano Romero, sa tuyo nga mahatagan sa mas taas nga bili ang maglulubi sa ilang mga produkto. 

Didto sa Kapihan sa PIA, Pebrero 8, gibutyag sa PCA nga ning semanaha, mingkanaug na usab ang presyo sa kopras: ang pasa naa sa P29 ang kilo gikan sa P31 sa miaging semana. 

Gipasabot usab sa PCA nga bisan pa kong ang Pilipinas ang usa sa labing daku nga tighatag sa supply sa kopras nga himoon nga lana, ulipon gihapon kini sa diktar nga presyo sa international nga merkado. 

Usa pa, matud ni Romero, dyutay na ang gikinahanglang corpas aron ipaagi sa proseso sanglit may mga bag-ong tinubdan na sa lana nga gigamit sa ubang mga nasud sama sa castor, corn, soybean ug palm, nga maoy gipagamit usab sa pagproseso sa Amerika. 

Dala niini, gisugyot sa PCA nga molingi usab sa ubang mga produkto nga mamahimo gikan sa lubi. 

Gipasabut usab sa PCA mao ang paghimo sa coconut sugar, gikan lamang sa ordinaryong sinanggot nga tangkoon sa dili pa ang upat ka oras gikan sa katapusang abis. 

Ug sama sa paghimo og tuba, salaon gihapon ang tinangko aron makuha ang mga ninaguno, sa dili pa kini ituson samtang kalingawan og sugkay. 

Dugang niya, kinahanglan lamang nga mogamit sa stainless nga lutuan, stainless nga luwag og padayong sugkay hangtud nga maitos og makuha ang dagway'g nalunok nga asukar. 

Ang asukar nga gikan sa lubi, sama ka tam-is sa asukar sa tubo apan may labing maayo nga pangtam-is alang sa mga tawo nga may sakit nga diabetes. 

Dugang sa PCA, sa duha ka gallon nga way tungog nga tinangko nga sinanggot, usa ka kilo nga asukar ang makuha. 

Kini, matud ni Romero, mapalit sa tag P540.00 ang kilo didto sa mga mall. 

Sayun ra ug mas hago pa ang magkalamay, aghat ni Romero, kinsa personal nga manghatag sa demonstration technology niini nagdto sa mga Small Coconut Farmers Organizations (SCFO) nga buot makakat-on sa pamaagi. (rahc/PIA-7/Bohol) 

Gikan sa "molana pay lunok," niay lunok nga mamahimong kasaligang tinubdan sa mga desperadong mangoprasay, sugod sa PCA didto sa Kapihan sa PIA. (PIA Bohol/google)