Kinatibuk-ang kadaut sa 

sunog nikunhod sa 2017

TAGBILARAN CITY, February 8 (PIA)--Nikunhod og halos 4 milyones ang naangin nga mga kabalayan og kabtangan nga nadaut sa sunog sa 2017 kon itandi sa nag-unang tuig. 

Kini maoy unod sa usa ka taho nga gibatbat ni Fire Superintendent Sheila Andrade, Bohol Provincial Fire Marshal didto sa tigum sa Provincial Peace and Order Council sa miaging semana. 

Gani nikunhod usab ang insedente sa sunog sa Bohol, taho ni Supt Andrade. 

Sa 163 ka mga insedente sa kaso nga miabut sa alarma sa mga kabomberohan sa 2016, nakunhod kini sa 34.97 % kay 106 na lang ka kaso sa sunog diin ang katawhan nakaparesponde sa kabomberohan, segun pa ni Andrade. 

Si Andrade, kinsa maoy labing unang babaye nga Provincial Fire Marshal ug bag-o pa lamang nga milingkod isip hepe sa mga kabomberohan sa Bohol, mibutyag nga subay sa mga damages nga gisukip sa mga affidavits of loss sa mga nasunogan sa 2017, mikabat kini sa kinatibuk-ang P16, 689,112. 

Sa pagka 2017, ang mga affidavits of loss nga gipakuyog sa matag may insedente sa sunog sa Bohol, mikabat lamang sa P12,629,025 ang mga damyos nga gideklara, nga may diperensya nga kapin sa P4 milyones. 

Napakita usab nga gawas sa sunog nga naglambigit sa mga sakyanang de motor nga mingdaghan gikan sa 140% o gikan sa 5 sa 2016 nga nahimo ng 12 sa 2017. 

Halos tanang gibantayan sa Bureau of Fire Protection batok sa sunog gawas niini, napakunhod.

Gikan sa 97 ka sunog sa mga residential occupancy sa 2016, 71 na lamang ang nahitabo sa 2017, diin milama ang -27% nga pagkubos. 

Sa mga business or government offices usab, gikan sa 4 ka hitabo sa sunog niadtong 2016, usa na lang ang natala sa 2017, segun pa ni Andrade. 

Ang labing daku nga pag-ubos sa insedente sa sunog nga natala sa BFP mao ang sunog sa mga kalibunan, poste sa koryente ug kalasangan. 

Duha na lang ka nga sunog nga naglangkob sa mga kalibunan, kalasangan ug poste sa ang girespondehan sa mga bombero sa 2017 samtang 27 niini ang giresponde sa 2016, segun pa sa BFP. 

Sa tulo ka kinabuhi nga nakalas sa 2016, napugngan na usab ang ka walay hinungdang pagkutlo sa kinabuhi dihang 2 ka kinabuhi ang nabuhis sa sunog sa 2017. 

Sa mga naangol, gikan sa 7 niadtong 2016, ug duha na lang usab sa 2017, taho sa BFP. 

Dala niining tanan, gilaraw sa bag-ong fire marshal nga magpadala og mga bombero aron makatambong sa Fire Arson Investigation and Inspection Course Training alang sa 40 ka oras nga bansay, samtang ipadayon ang pagpakigsabut sa mga LGUS aron ikapahimutang ang mga gikinahanglang fire hydrants. 

Paninguhaon usab ni Andrade nga makapangitag pundo aron ikapaayo sa mga firetrick ug pagpalit sa mga ekips nga labaw nga gikinahanglan. 

Makigsabut usab ang BFP sa mga mayor kabahin sa donasyon sa mga fire truck ug pagpasugod sa mga firestations aron matibawas ang 10 na lamang ka lungsod nga wala pa niini.

Pangayoon usab sa bag-ong Bol-anong fire marshal ang dugang bombero gikan sa BFP subay usab sa regional order niini, alang sa Bohol. (rahc/PIA-7/Bohol)

Mas hayag nga laraw alang sa pagpugong sa sunog sa Bohol ang gilatid ni FSupt Sheila Andrade didto sa PPOC. Nataho usab ni Supt Andrade ang pagkunhod sa insidente ug kadaut sa sunog sa Bohol sa 2017 kon itandi sa 2016. (rahc/PIA-7/Bohol)