DOE, miseguro nga padayon ang ilang 

pag-monitor sa mga kumpanya sa lana 

MANILA, Pebrero 05 (PIA)--Gi-anunsiyo sa Department of Energy (DOE) nga ginahimo nila ang tanang lakang aron masiguro nga sakto ang implementasyon sa Tax Reform for Acceleration and Inclusion (TRAIN) law.

Kalabot kini sa pagsunod sa mga kumpanya sa lana sa direktiba sa DOE nga i-bawal ang price hike hangtod sa Enero 15 o ang adlaw nga gipaabot sa ahensiya nga mahurot ang daang stock sa produktong petrolyo.

Matud pa ni DOE Assistant Secretary Leonido Pulido III, padayon ang monitoring nila sa industriya ug mi-responde na usab ang ilang ahensiya sa mga sumbong nga may mga gas stations nga sayong nagpatuman og pagsaka sa presyo sa mga produktong petrolyo tungod sa epekto sa TRAIN law.

Gani, niduso na ang DOE og show cause orders alang sa 22 ka gasolinahan ug LPG retailers nga sayong nag-implementar og dugang buwis.

Samtang base sa banabana sa DOE, posibleng mag-resulta ang sayop nga implementasyon sa TRAIN law sa dili saktong pagkolekta sa mga buhis nga mokabat sa P2.649-bilyon alang sa petroleum gas ug P58.4-milyon alang sa liquid petroleum gas. (ecb/PIA7-Bohol)

==============

PCA, naglaraw og ‘coconut sap

sugar production’ sa Bohol

TAGBILARAN CITY, Pebrero 05 (PIA)--Ang Philippine Coconut Authority (PCA) sa Bohol naglaraw sa pagbansay sa mga mag-uuma sa produksiyon sa ‘coconut sap sugar’ o asukal gikan sa lubi isip parte sa tinguhang ipatukpaw ang panginabuhian sa mga tigpananom og lubi ug sa industriya sa lubi sa kinatibuk-an.

Matud pa ni PCA Bohol provincial manager Emiliano Romero, andam ang ilang buhatan sa paghatag og technical support ngadto sa mga coconut farmers pinaagi sa paghatag og ekipo alang sa pag-proseso sa raw ingredients.

Gipasabot usab niini nga ang produksiyon sa ‘coconut sap sugar’ gipaabot nga makahatag og mas dakong kita alang sa mga mag-uuma.

“Sa 100 kabuok nga punoan sa lubi, makaprodyus ka o maka-earn ka ana og about half a million [pesos] sa imong net income,” matud pa ni Romero.

Ang coconut sap sugar o asukal gikan sa lubi nisikat na karon sa tibuok kalibotan diin gitawag kining “wonder sugar” tungod sa pagbaton niini og ubos o low glycemic index nga 35 matag serving, kun itandi sa GI 70 sa cane-based sugar o asukal gikan sa tubo.

Niadtong tuig 2007, nagsugod ang Pilipinas sa pag-export og coconut sap sugar ngadto sa Estados Unidos ug Japan. Dugang shipments usab ang nahimo sa mga misunod nga tuig.

“Angay ni sa mga tawo nga nay sakit nga diabetes kay ubos kaayo ni siya og glycemix index itandi sa cane sugar,” pasabot pa ni Romero.

Gi-awhag sa PCA kadtong mga interesado nga mahimong parte niining nagtubo nga industriya sa pagbisita sa ilang buhatan nga nahimutang duol sa buhatan sa Land Transportation Office (LTO) ning syudad sa Tagbilaran alang sa dugang kasayoran mahitungod niining programaha. (ecb/PIA7-Bohol)