DSWD-7, mibansay sa 76 ka Pantawid Pamilya 

partner-beneficiaries sa syudad sa Tagbilaran 

TAGBILARAN CITY, Pebrero 02 (PIA)--Ang Department of Social Welfare and Development (DSWD) Field Office VII mibansay ning bag-o lang sa mga Pantawid Pamilya partner-beneficiaries kalabot sa Entrepreneurship Development Training (EDT) sa pakig-kumbuya sa kagamhanang lokal sa syudad sa Tagbilaran ug sa Department of Trade and Industry (DTI). 

Ang 76 ka Pantawid Pamilya partner-beneficiaries sa Barangay Booy, ning syudad gibansay agi og pagpangandam sa nagsingabot nilang proyekto nga gi-pondohan sa DSWD pinaagi sa Sustainable Livelihood Program (SLP) aron matabanga’ng makahupay sa ilang kalisod.

Matud pa ni Pantawid Pamilya Social Welfare Officer (SWO) III Ma. Charo Poligrates, ang maong pagbansay nagtinguhang tabangan ang mga benepisyaryo nga mahimong tinuod nga mga negosyante og dili lamang mamaligyaay sa panahon sa kagabhion. 

“Social preparation is the most important and integral part of doing and implementing a project. That’s why, before the actual business operation, participants must be socially, mentally and emotionally prepared,” matud pa ni Poligrates.

Ang maong pagbansay gitunga ngadto sa buntag ug hapon nga sessions ug matag sumasalmot naminaw sa lecture ug nihangop sa bag-ong kahibalo nga gipa-ambit ngadto kanila sa resource speakers gikan sa DTI. 

Tungod sa kalamposan sa EDT, ang maong pagbansay gi-kopya usab sa ubang asosasyon sa barangay sama sa Manga, Ubujan ug Mansasa. 

Si Riza Pandan, usa sa mga partisipante nagkanayon, “Ang natabang sa EDT kay ang paghatag kanamu sa kahibalo aron ma-andam kung unsaon pagdala sa umaabot namong negosyo. Unsaon pag-pamaligya or pag-deal sa mga customer aron mu-asenso (EDT helped us to gain knowledge for us to be ready to engage in business like how to market the products and how to deal with customers in order to succeed).”

“Labaw pa gi-tudloan kami og mga pama-agi kun unsay buhaton aron dili malugi ug ang importante pud kay naa mi savings (Moreover, we were taught on strategies that will help keep us from bankruptcy. And most importantly we were taught about savings),” dugang pa ni Riza. (ecb/PIA7-Bohol/DSWD-7)

Si Ms. Claire Apale (nagtindog) gikan sa Department of Trade and Industry (DTI) isip resource speaker alang sa Entrepreneurship Development Training (EDT) sa mga 4Ps beneficiaries sa barangay Booy sa syudad sa Tagbilaran. (DSWD-7 photo)