Pagkunhod sa krimen dinhi

mapaabut sa 4 ka buwan

TAGBILARAN CITY, February 1 (PIA)--Sa sunod nga tulo ngadto sa upat ka buwan, mapaabut ang pag-ubos sa kriminalidad sa Bohol. 

Kini maoy buot nga kab-uton sa kapolisan sa Bohol kinsa usab karon nag-atubang sa padayon nga pagtaas sa mga krimen nga napadaghan tungod sa mga aksidente sa kadalanan. 

Sa unang pagtambong ni PSSupt Angeles Geñorga sa Provincial Peace and Order Council (PPOC) Meeting human siya mopuli sa pagka provincial Director sa PNP sa Bohol, namatikdan gilayon niya ang nagkataas nga aksidente sa kadalanan nga nag guyod sa kriminalidad sa Bohol aron mas modaghan. 

Sa paglingkod ni PSSupt Angeles Geñorga sugod niadtong Enero 16, nagpabutyag usab sa kanhi opisyal sa kapolisan nga ekspertong nagtutok sa criminal investigation, sa pagbalaybalay na sa iyang himoong response alang niini. 

Wala pa man isibya sa publiko ang mga prayoridad sa bag-ong hepe sa kapolisan sa Bohol, halos makita na ang kinatibuk-ang dagan niini sa sunod nga mga buwan. 

Segun sa iyang gitaho ngadto sa PPOC, niadtong Enero 29, bout ni Supt Geñorga nga may mas daghang pulis nga ikita sa mga karsada, pagpadaghan sa mga street watch volunteers ug mga multiplier forces, samtang iyang hugton ang pagpatuman sa patrol beat system dungan sa pagsangon sa kapolisan sa traffic duty. 

Subay niini ug segun sa future plans sa Bohol Provincial Police Office (PBPPO), nakalinya na ang pagpamalit sa Patroller’s Visibility Vest, aron sayon rang ilhon ang kapolisan nga naghimo og pagpatroya, aron mas makita ang kapolisan. 

Naka line-up usab ang bansay-bansay sa barangay ug pulisya batok sa krimen diin ang programa magpadaghan sa mga street watch volunteers ug mga police multiplier forces batok sa krimen. 

Gani, gihatagan og gibug-aton ni PSSupt Geñorga sa kinatibuk-ang pagpatuman sa kapolisan sa Patrol Beat System diin ipasunod na ang extended nga oras sa duty alang sa mga nagpatrolya ug ubang mga personahe nga naa sa adminsitration work. 

Gipasabut usab sa bag-ong hepe nga iya na nga ipa-undang ang naandan nga duha ka adlaw nga duty unya may day-off. 

Matud ni Supt. Geñorga, bisan gani sa usa ka adlaw nga duty, dili na kasaligan ang ka-askil sa usa ka pulis, kay mabati na gyud ang kakapoy. 

Unsaon man ni nila pagpadayon sa ilang level of alertness, labi na sa kagabhi-on? pangutana sa Bikolano nga hepe. 

Samtang suspendido pa ang deputation sa Land Transportation Office (LTO) sa mga kapolisan nga mahimong traffic deputies, gipahat na sa Campo Dagohoy ang mga personahe sa kapolisan nga ipailawom sa pagbansay sa traffic duty aron mahunhoran na ang mga insidente sa trapiko.

Hangyoon usab sa Kampo Dagohoy ang PNP nga magpadala sa mga bag-ong opisyal sa kapolisan dinhi sa Bohol. 

Gitaho sa PNP nga 29 lamang sa 48 ka police stations sa Bohol ang gipangulohan sa police commissioned officers samtang 19 pa ka estasyonan ang may hepe nga non commissioned officers. (rahc/PIA-7/Bohol)

Sobhan sa mas daghang presensya sa kapolisan sa kadalanan ang unang 4 ka buwan ni PSSupt. Angeles Geñorga ang Bohol aron guyoron pagpaubos ang mga krimen ilabi na sa mga aksidente sa kadalanan nga dala sa walay disiplina ug mga drivers nga walay lisensya, sakyanang walay rehistro. (rahc/PIA-7/Bohol)