Mga OFW nga nipaule gikan Kuwait, 

tanyagan og libreng skills training sa TESDA

TAGBILARAN CITY, Pebrero 19 (PIA)--May tanyang nga libreng skills training isip tabang sa mga nipauleng overseas Filipino workers (OFWs) gikan Kuwait ang Technical Education and Skills Development Authority (TESDA). 

Matud pa ni TESDA-Bohol Information Officer Marichu Cua, sa ingon aning paagi sa pagtabang man mahatagan og kahigayonan ang mga namauling OFW nga magbaton og kaugalingon nilang mga negosyo o di kaha makapangita og bag-ong trabaho.

Kahinumdoman nga nagpatuman na ang gobyerno og deployment ban alang sa mga OFW sa Kuwait tungod sa pagdaghan sa mga kaso sa pang-abusar ug pagpatay sa mga Pinoy nga empleyado sa maong nasod.

Si Cua nagkanayon nga gimanduan na ni TESDA Director Guiling Mamondiong ang mga regional, provincial ug district directors ug bisan ang mga TESDA accredited technology institutions nga i-prioritize sa libreng training ang mga OFW nga apektado sa deployment ban sa Kuwait.

Giingong makig-alayon ang TESDA sa Overseas Workers Welfare Administration (OWWA) aron mapakatap nila ang maong tanyag sa mga namauleng OFWs.

Gawas nga libre ang training, maghatag usab ang TESDA og allowance alang sa pagkaon ug pletehan sa mga mopaubos sa maong training. 

Gi-awhag sa TESDA ang mga namauleng OFWs nga Bol-anon sa pagbisita sa ilang mga buhatan dinhi sa lalawigan aron makapahimos niining libreng skills traning. (ecb/PIA7-Bohol)

=============

National TVET Enrollment Day ug 

Jobs Bridging, ipahigayon sa TESDA

TAGBILARAN CITY, Pebrero 19 (PIA)--Gidapit sa Technical Education and Skills Development Authority (TESDA) ang tanang estudyante sa senior high school ug mga nakatapos sa Tech-Voc sa pagtambong ug pagsalmot sa National TVET Enrollment Day Program.

Matud pa ni TESDA-Bohol Information Officer Marichu Cua, ipahigayon ang National Technical Vocational Education and Training (TVET) Enrollment Day ug Jobs Bridging Program sa Pebrero 28, 2018.

Ipahigayon kini sa tulo ka dapit dinhi sa lalawigan sa Bohol nga mao ang BIT-IC sa syudad sa Tagbilaran, Jagna Business Center sa lungsod sa Jagna, ug sa Ramon Magsaysay Multi-Purpose Gym sa lungsod sa Ubay.

Kining kalihokan nagtinguhang maghatag og kasayoran sa nagkalain-laing TVET programs alang sa mga Bol-anon ug pag-promot sa TVET isip ‘preferred choice of career’.

Matud pa ni Cua nga ilang e-pasilitar sa maong adlaw ang enrollment sa mga interesadong aplikante sa ilang mga TESDA scholarship programs.

Ipahigayon kini gikan sa alas 9 sa buntag ngadto sa alas 3 sa hapon sa maong adlaw.

Bukas sa publiko kining kalihokan sa TESDA. (ecb/PIA7-Bohol)