Total deployment ban sa mga OFW 

sa Kuwait, ipadayon na – DOLE 

MANILA, Pebrero 14 (PIA)--Gipadayon na sa Department of Labor and Employment (DOLE) ang hulga sa gobyerno nga dili na magpadala og mga overseas Filipino workers (OFWs) sa Kuwait tungod sa daghang insidente og pang-abuso, pagmaltrato ug pagpatay sa mga trabahanteng Pinoy. 

Kagahapon sa gi-isyung Administrative Order ni DOLE Kalihim Silvestre Bello III, gimando niini ang pagpatuman og total ban sa deployment sa mga OFWs sa Kuwait. 

Kalabot niini, bisan unsang adlaw sukad karon moadto na sa Kuwait ang gimugnang Task Force Dimapilis nga magpahigayon og imbestigasyon kalabot sa pagkamatay ni Joana Dimapilis, ang domestic helper nga nakit-ang patay sulod sa freezer nga niadtong usang tuig pa wala nakita ug nabalitaan sa iyang mga paryente ug higala. 

Sa usa ka pulong balitaan, si Bello nagkanayon nga maki­pag-alayon ang Task Force sa Kuwaiti Police aron matumbok kun may gihimong imbestigasyon sa kaso sa Pinay 

Giingong estoryahon usab sa Task Force ang Philippine Overseas Labor Office (POLO) kun nganong usa ka tuig pa ang milabay usa nadiskubrehan ang pagkamatay ni Joana. 

Samtang, gitan-aw na karon sa gobyerno ang ubang mga nasod nga posibleng balhinan sa mga OFWs nga apektado sa deployment ban sa Kuwait. 

Ang mga nasod nga giingong mahimong padalhan pa og mga OFWs mao ang Israel, Czechoslovakia, Germany ug Japan. 

Gibutyag usab ni Bello nga posibleng karong buwan o di kaha sa sunod buwan molagda ang Pilipinas ug China sa usa ka bilateral agreement alang sa pag-deloy og mga OFW didto. 

Kini tungod sa giingong panginahanglan sa China og mokabat sa 100,000 ka mga English teachers nga may sweldong $1,500 o kapareho sa P78,000. 

Gawas sa English teachers, gibutyasg usab sa DOLE nga nanginahanglan usab ang China og mga English-speaking nga household workers. (ecb/PIA7-Bohol) 

===============

Saktong suholan sa Chinese New Year ug EDSA 

People Power Anniv., gipahinumdom sa DOLE 

TAGBILARAN CITY, Pebrero 14 (PIA)--Nagpahinumdom ang Department of Labor and Employment (DOLE) sa mga employers kalabot sa saktong suholan sa mga kawani sa pribadong sektor sa Pebrero 16, Chinese New Year ug Pebrero 25 nga anibersaryo sa EDSA People Power Revolution. 

Sa advisory nga gipagawas ni DOLE Kalihim Silvestre Bello III, ang maong mga petsa gi-deklarar man nga Special Non-working Day ni Presidente Rodrigo Duterte pinaagi sa Proclamation No. 269. 

Matud pa sa DOLE nga sa maong mga petsa, ipatuman ang “no work no pay policy” gawas na lamang kun adunay kasabotan o Collective Bargaining Agreement (CBA). 

Kun ang usa ka empleyado mosulod sa maong mga adlaw, makadawat kini og dugang 30 porsiyento sa iyang inadlaw nga suholan sa unang walo ka oras sa pag-trabaho. 

Ug kun molapas sa walo ka oras nga pag-trabaho, makadawat kini og 30 porsiyento sa iyang hourly rate. 

Samtang kun natunong sa day-off apan mosulod pa gihapon sa trabaho, makadawat kini og 50 porsiyento sa iyang inadlaw nga suholan sa unang walo ka oras nga pag-trabaho. 

Apan kun molapas sa walo ka oras nga pag-trabaho, makadawat kini og dugang 30 porsiyento sa iyang hourly rate. (ecb/PIA7-Bohol)