DA, target nga palambuon pa ang 

pagpananom og humay sa Bohol 

TAGBILARAN CITY, Mar. 22 (PIA)--Target sa Department of Agriculture (DA) nga palambuon pa ang industriya sa pagpananom og humay sa lalawigan sa Bohol. 

Sigun pa kang DA Kalihim Manny Piñol, bisan nalukop ang mga yuta og umahan ang lalawigan, ubos man ang produksiyon sa humay tungod kay kinaraan pa ang gigamit nga pamaagi sa pagpananom. 

Gibutyag ni Piñol nga may kasabotan na ang iyang ahensiya ug ang lokal nga kagamhanan sa Bohol nga itanyag sa mga mag-uuma ang Production Loan Easy Access Program ubos sa Agriculture Credit Policy Council diin mahimo silang makahulam og puhunan. 

Giingong palapdan usab sa DA ang pagtanom og mga hybrid rice seeds ug target niining bisan katunga sa mga yutang tamnan magbaton niini. 

Una na usab gisugdan ang pagtanom og binhi sa hybrid rice sa lalawigan ug nakitang may potensiyal kining maka-prodyus og kapin sa 11 metriko tonelada matag ektaryas, gikan sa kasamtangnag 2.6 metriko tonelada nga ani lamang matag ektarya. 

Niadtong Marso 15, si Piñol nibisita dinhi sa lalawigan ug niapod-apod sa ‘certificates of commitments’ sa mga proyektong pang-agrikultura ug pangisdaan nga nagkantidad og P 450 milyon nga e-implementar ning tuig nga gi-pondohan ubos sa 2018 budget sa DA. (ecb/PIA7-Bohol) 

==============

6 buwan nga tagal, gihatag ni Cimatu aron gub-on 

ang mga ilegal nga estraktura sa isla sa Panglao 

TAGBILARAN CITY, Mar. 22 (PIA)--Gihatagan lamang og unom ka buwan ni Department of Environment and Natural Resources (DENR) Kalihim Roy Cimatu ang mga tag-iya og resorts sa isla sa Panglao sa pagguba sa ilang mga ilegal nga estraktura. 

Si Cimatu nihatag sa maong direktiba human personal niyang gisusi ang kabaybayonan sa Alona Beach sa Barangay Tawala sa isla sa Panglao niadtong Martes sa buntag diin iyang nakita ang daghang estraktura nga nahisulod sa 20-meter easement zone. 

Gimanduan ni Cimatu si Environmental Management Bureau (EMB) 7 Regional Director William Cuñado sa pagpadala og notices of violations sa tanang tag-iya og resort kansang mga estraktura nilapas sa salvage zone sa isla sa Panglao ug pagduso og report ngadto kanya. 

Iyang gimanduan si Cuñado nga hinloan ang isla sa mga misupak sa 20-meter public easement zone. 

Si Cuñado mibutyag niadtong Lunes atol sa Panglao Island and Tagbilaran Executive Council (PITEC) Board Meeting nga gipahigayon sa Bohol Tropics Resort nga may 87 ka ‘violators of easement area’ diin kadaghanan niini nahimutang sa mga barangay sa Tawala, Danao, Doljo, Libaong ug pipil usab ka mga barangay sa lungsod sa Dauis. 

Si National Economic and Development Authority (NEDA) director-general Ernesto Pernia, usa ka Bol-anon, miabot sa Bohol niadtong Martes sayo sa buntag og gikuyogan si Cimatu sa pagsusi sa kabaybayonan sa Alona. 

Si Pernia nagkanayon ngadto sa media nga ni-cover sa maong pagsusi sa Panglao nga seryoso gayud ang gobyerno sa pag-protehir ug pag-konserbar sa atong natural resources. 

Ang pagsusi sa ‘salvage zone violation’ sa isla sa Panglao gihimo human usab mibuto ang problema sa isla sa Boracay. 

Apan si Cimatu nagkanayon nga ang problema sa isla sa Panglao dili ingon kadako kun itandi sa isla sa Boracay nga una nang gihulagway ni Presidente Rodrigo Duterte nga “cesspool” o hugaw. 

Matud pa ni Cimatu nga gitakda usab nilang susihon ang mga establisemento sa Palawan ug ubang probinsiya. (ecb/PIA7-Bohol)

Si DENR Kalihim Roy Cimatu misusi sa kabaybayonana sa Alona Beach sa Barangay Tawala sa lungsod sa Panglao niadtong Marso 20, 2018 sa buntag. (ecb/PIA7-Bohol)