Index crime sa syudad 

sa Tagbilaran, nikundod 

TAGBILARAN CITY, March 23 (PIA)--Gikan sa 71 nga natalang index crime sa syudad sa Tagbilaran sa buwan sa Enero ning tuig, nikunhod kini og 68 na lamang ang natala sa buwan sa Pebrero. 

Mas ubos usab kini kun itandi sa susamang panahon sa niaging tuig nga may natalang 94 base sa datos nga gi-presentar kagahapon ni Tagbilaran City Police Chief, Supt. Patricio Degay Jr. 

Ang kapolisan mi-presentar sa mga datos atol sa gipahigayong Joint Meeting sa City Peace and Order (CPOC) & City Anti-Drug Abuse Council (CADAC) nga gipangunahan ni Tagbilaran City Mayor John Geesnell Yap II. 

Ang pagkunhod sa gidaghanon sa mga krimen dinhi sa syudad sa Tagbilaran tungod sa gitawag nga ‘police visibility’ nga gipatuman sa kapolisan diin ang ilang bahan nagpahigayon og mga checkpoints nga wala ibutyag ang mga schedule sa bisan unsang panahon gikan alas 9 sa buntag hangtod alas 5 sa hapon. 

Kini ang nakapugong sa nagkalain-laing mga drivers nga walay mga lisensya ilabi na kadtong mga estudyante sa sekondarya nga walay mga lisensya. 

Ang mga tinugyanan sa kapolisan gipangapud-apod ngadto sa kadalanan 24 oras sa duha ka mga shiftings – alas 8 sa buntag ngadto sa alas 8 sa gabii alang sa adlaw nga shift ug alas 8 sa gabii ngadto sa alas 8 sa buntag alang sa gabii nga shift. 

May 4 usab ka mga Motorist Anti-Street Crime Operatives (MASCO) kinsa nag-alagad atol sa panahon sa adlaw ug gabii nga nakatabang sa pagsumpo sa mga krimen. 

Kini naglakip sa duha ka mga sektor – ang Sektor 1 nga naglakip sa mga dapit gikan sa Blood Compact Shrine ngadto sa University of Bohol (UB) samtang ang sektor 2 naglakip sa mga dapit gikan sa Dr. Cecilio Putong National High School (DCPNHS) sa Cogon paingon sa barangay Manga. (ecb/PIA7-Bohol). 

===============

Pagbukas sa PCIC Tagbilaran ug Ubay extension office, 

maghatag og proteksiyon sa mga mag-uuma ug mangingisda 

TAGBILARAN CITY, March 23 (PIA)--Gibuksan na ang duha ka extension offices sa buhatan sa Philippine Crop Insurance Corporation (PCIC) dinhi sa lalawigan sa Bohol nga maghatag og proteksiyon sa mga mag-uuma ug mangingisda. 

Niadtong Marso 19, gibuksan ang PCIC extension office sa lungsod sa Ubay nga nahimutang sa Gaviola Compound samtang ang Tagbilaran extension office nga nahimutang sa BOPEL Building, dalan F. Rocha ning syudad, gibuksan usab niadtong Marso 20. 

Ang pagbukas sa 2 ka extension offices dinhi sa lalawigan gitumong aron ikapaduol ang serbisyo sa goberno ngadto sa katawhan ilabi na alang sa mga mag-uuma. 

Ang PCIC usa ka government owned and controlled corporation kansang gimbuhaton mao ang paghatag og panalipud pinaagi sa pagseguro sa mga tinanum sa uma. 

“Kining atong pagbukas isip sanong sa nagka-anam og kadaghang mga mag-uuma ug manangat nga angay hatagan og proteksiyon ilabi na nga nag usab-usab ang atong panahon, matud pa ni PCIC Regional Manager II Crescencio Deligero Jr. sa iyang welcome address sa pagbukas sa ilang extension office sa Tagbilaran. 

Ang buhatan nagtanyag og insurance gikan sa kadaut dala sa kalamidad, sakit sa tanum og mga dangan nga moigo sa humay, mais, high value crops ug uban pang gipa-insure. 

Sakop usab sa mahimong i-insure sa PCIC ang mga makinarya nga gigamit sa panguma, aron, kon magkina-unsa, may kadangpan pa gihapon ang mag-uuma bisan pa kon mabanlas ug masayang ang iyang gitanum. 

Si Antonio Uy II, ang VP-Corporate Business Affairs Group sa PCIC mibutyag nga tanang mga mag-uuma ug mangingisda gihatagan na og libreng insurance. 

Ug tungod sa lokasyon sa Pilipinas nga naduol sa agi-anan sa mga bagyo ug nasulod sa Pacific Ring of Fire, misamot ang kasibut sa kagamhanan nga tabangan ang mga mag-uuma kansang mga puhunan mahimong mapapha uban sa mga katalagman. 

Isip ahensya nga tigpatuman sa insurance sa agrikultura sa kagamhanan ubos sa Presidential decree 1467 nga napabag-o sa Republic Act 8175, ang PCIC natahasan nga magtanyag sa insurance ngadto sa mga pobreng mag-uuma batok sa pagkapildi sa pananum ug kagamitan dala sa bagyo, baha, huwaw, linog, mga sakit ug uban pang hulga. (ecb/PIA7-Bohol). 

Gipangunahan ni Antonio Uy II, PCIC VP-Corporate Business Affairs Group ang pagbukas sa PCIC extension office sa lungsod sa Ubay nga nahimutang sa Gaviola Compound niadtong Marso 19. (hulagway sa PCIC) 

Ang pagbukas sa PCIC Tagbilaran extension office nga nahimutang sa BOPEL Building, dalan F. Rocha ning syudad niadtong Marso 20. (ecb/PIA7-Bohol).