Magnitude 4.1 nga linog, 

nitay-og sa Bohol 

TAGBILARAN CITY, Mar. 20 (PIA)--Nakasinati og pagtay-og nga magnitude 4.1 nga linog ang pila ka parte sa lalawigan sa Bohol, mga alas 10:46 sa gabii sa Lunes. 

Matud pa sa datos sa Philippine Institute of Volcanology and Seismology (Phivolcs), natala ang episentro sa pagtay-og sa gilay-ong 9 ka kilometro sa habagatang sidlakan sa lungsod sa Anda, Bohol. 

May gilawmon kining napulog-duha ka kilometro ug tectonic ang gigikanan niini matud pa sa Phivolcs. 

Samtang natala ang Intensity III nga paglihok sa yuta sa syudad sa Tagbilaran. 

Apan wala hinuoy natala nga kadaot sa pagtay-og sa mga estruktura sa mga apektadong lugar. (ecb/PIA7-Bohol) 

===============

DENR Kalihim Cimatu, nia sa Bohol

aron personal nga mosusi sa mga resorts

TAGBILARAN CITY, Mar. 20 (PIA)--Niabot si Department of Environment and Natural Resources (DENR) Kalihim Roy Cimatu kagahapon dinhi sa Bohol aron personal nga mosusi sa mga resorts dinhi sa lalawigan.

Nitambong si Cimatu sa gipahigayong tigom sa Panglao Island and Tagbilaran Executive Council (PITEC) Board Meeting nga gipahigayon sa Bohol Tropics Resort kagahapon sa hapon.

Ang maong tigom gitambongan nila Gob. Edgar Chatto, Tagbilaran City Mayor John Geesnell Yap II, Dauis Mayor Miriam Sumaylo, Panglao Mayor Pedro Fuertes, mga miyembro sa PITEC, mga tag-iya og resorts sa Panglao ug mga opisyal sa DENR.

Sa maong tigom, gi-presentar sa PITEC ngadto sa Kalihim sa DENR ang policy actions ug mga inisyatiba sa grupo aron masulbad ang nagkalain-laing environmental concerns sa isla sa Panglao.

Matud pa ni Cimatu nga ideyal ang mga gibuhat sa Bohol apan angay usab nga huna-hunaon ang Panglao sa umaabot ug mahinungdanon nga e-determinar ang ‘carrying capacity’ sa Panglao aron dili maunhan sa mga problema.

Ang kalihim nagkanayon nga tanan sa Bohol (atraksiyon ug kalikan) naghimo sa turismo nga ‘promising’ kun itandi sa ubang destinasyon.

Base sa finding sa DENR, 87 ka pribado ug korporasyong establisyemento sa isla sa Panglao ang adunay estraktura nga nahisulod sa 20-meter easement.

Ang maong 87 ka establisyemento gi-isyuhan og Notice of Violation (NOV).

Ang DENR makig-koordinar sa lokal nga kagamhanan aron pag-require sa mga resort/establisemento nga gi-isyuhan og NOVs sa pagpahigayon og ‘voluntary clearing of structures’.

Samtang ang DENR CENRO Tagbilaran City kauban sa Municipal Planning Office/Tourism Office o Engineering Office sa munisipyo sa Panglao ug Dauis, magpadayon sa delineation ug demarcation sa easements zone sa entiro isla sa Panglao.

Karong adlawa, si Cimatu kauban sa Bol-anong National Economic and Development Authority (NEDA) Kalihim Ernesto Pernia misusi sa mga resorts sa isla sa Panglao. (ecb/PIA7-Bohol)

Si DENR Kalihim Roy Cimatu sa iyang pagtambong sa tigom sa Panglao Island and Tagbilaran Executive Council (PITEC) Board Meeting nga gipahigayon niadtong Lunes sa Bohol Tropics Resort, syudad sa Tagbilaran. (ecb/PIA7-Bohol)