Mas dagkong plaka alang sa 

mga motorsiklo, aprubado na 

TAGBILARAN CITY, March 16 (PIA)--Aprubado na sa duha ka komite ang paggamit sa mas dagkong plaka ug mga ‘identifying marks’ sa mga motorsiklo. 

Tumong niining balaodnon nga nakalusot na sa House committees on Transportation and Public Order and Safety nga makuhaan ang gitawag nga ‘motorcycle crime’ o krimen diin motorsiklo ang gigamit nga sakyanan sa mga kriminal. 

Ubos sa maong balaodnon, hatagan og awtorisasyon ang Land Transportation Office (LTO) nga magtakda sa gidak-on sa plaka sa motorsiklo basta kinahanglang mabasa kini sa minimum distance nga 12 metros. 

Si House Public Order and Safety Committee chairman Romeo Acop nagkanayon nga gilaoman na nilang mahimong ‘deterrent’ kini sa motorcycle crime tungod kay mas mahimong dali ang pagtumbok sa motorsiklo nga gamit sa krimen. 

Nakalatid usab sa maong balaodnon nga kun ang usa ka kriminal mogamit og usa ka impounded nga motorsiklo, maximum penalty sa krimeng gihimo niini ang ipahamtang sa hukom. (ecb/PIA7-Bohol) 

===============

P450-M kantidad sa mga proyektong pang-agrikultura 

ug pangisdaan, gigahin sa DA alang sa Bohol sa 2018 

TAGBILARAN CITY, March 16 (PIA)--Ang kalihim sa Department of Agriculture (DA) niapod-apod kagahapon sa ‘certificates of commitments’ sa mga proyektong pang-agrikultura ug pangisdaan nga nagkantidad og P 450 milyon nga e-implementar ning tuig. 

Matud pa ni Kalihim Emmanuel Piñol, kining mga proyekto gi-pondohan ubos sa 2018 nga budget sa DA. 

Sigun pa ni Piñol, gamiton sa DA ang Rice Processing Center (RPC) sa lungsod sa Pilar sa pag-prokyur ug pagpangapod-apod sa mga lokal nga abot nga humay, samtang ang Bureau of Fisheries and Aquatic Resources (BFAR) ang mohatag sa kinahanglanon post-harvest alang sa cold storage facility. 

Si Piñol, kauban ni Cabinet Sec. Leoncio Evasco, Jr., nitambong sa usa ka adlaw nga Incident Command System - Executive Course (ICS-EC) alang sa mga mayor sa Bohol kagahapon nga gipahigayon sa Kagamhanang Probinsiya sa Bohol didto sa Bohol Tropics Resort, ning syudad. 

Ang kalihim sa agrikultura nakighimamat sa mga mayor ug nipahibalo sa mga nag-una ug dagkong plano ug proyekto sa ilang buhatan alang sa lalawigan sa Bohol. 

Nipasalig kini nga ang labing unang dakong dairy program sa lalawigan mahinayon gayud. 

Gipasabot sa kalihim nga tungod sa sakit nga foot and mouth disease (FMD) nga na-apekto sa Girolando cattle breed sa Brazil, ang Bohol mo-angkat og susamang rasa sa Mexico. 

"So don't be surprised if one day soon, you will see Bohol milk displayed in big supermarkets, pagdeklarar pa ni Piñol. 

Samtang gibutyag usab sa kalihim sa DA nga iyang ipalayag dinhi sa Bohol ang bag-ong Barko ng Republika ng Pilipinas (BRP) nga Francisco Dagohoy sa Hunyo 4, ang adlaw’ng natawhan sa bayaning Bol-anon diin gipangalan ang maong barko. (ecb/PIA7-Bohol) 

Si DA Kalihim Emmanuel Piñol nanguna sa pagpangapod-apod sa ‘certificates of commitments’ sa mga proyektong pang-agrikultura ug pangisdaan dinhi sa Bohol nga nagkantidad og P 450 milyon nga gisaksihan nilang Gob. Edgar Chatto ug Cabinet Sec. Leoncio Evasco, Jr. atol sa gipahigayong Incident Command System - Executive Course (ICS-EC) alang sa mga mayor sa Bohol niadtong Huwebes sa Bohol Tropics Resort, syudad sa Tagbilaran. (photo from DA-7)