Mga kulurom ug overloading nga motorized bangka, 

gipabantayan sa Malakanyang karong Semana Santa 

MANILA, Marso 26 (PIA)--Gipabantayan sa Malakanyang sa Department of Transportation (DOTr) dili lang ang mga kulurom nga mga bus apan apil na usab ang mga kulurom ug mga overloading nga bangkang de motor. 

Si Presidential Communications Operations Office (PCOO) Kalihim Martin Andanar nagkanayon nga dili malimod nga modagsang ang mga pasahero karong Semana Santa. 

Matud pa ni Andanar nga gigamit ang mga bangkang de motor o lantsa isip mga pampublikong sakyanan sa dagat sa mga lalawigan. 

Dungan niini, nagpagawas og pahinumdom ang Philippine Coast Guard (PCG) sa publiko. 

Alang sa mga mo-biyahe sa kadagatan, nipahinumdom ang PCG nga angay makisayod sa kahimtang sa panahon sa pagbiyahe aron malikayan ang pagkalangan. 

Gi-awhag nila ang publiko sa pagbisita sa website sa Philippine Atmospheric, Geophysical and Astronomical Services Administration (PAGASA) alang sa weather advisory o kahimtang sa panahon ug makisayod o motawag sa pinakaduol nga Coast Guard Units sa ilang lugar. (ecb/PIA7-Bohol)

==============

SSS, nagbukas og bag-ong 

Loan Restructuring Program 

TAGBILARAN CITY, Marso 26 (PIA)--Subling nagbukas og Loan Restructuring Program ang Social Security System (SSS) sa tanang mga miyembro niini nga adunay short term loan o utang nga wala na nabayran og unom ka buwan pataas. 

Principal loan ug interes nalang ang kinahanglang bayran sa miyembro ug dili na sila paninglan pa sa SSS og binuwang penalty o silot. 

Mahimo kining bayran taman sa lima (5) ka tuig. 

Gi-ubsan na usab ngadto sa 3% ang interes gikan sa normal interest rate nga 10%. 

Mahimong mo-apply niini ang mga SSS member nga may edad 65 anyos paubos nga adunay loan ug nagpuyo o nag-trabaho sa mga lugar nga naapektuhan og kalamidad. 

Tanang gusto mo-avail og loan restructuring program sa SSS gitambagan sa pagbisita sa tanang SSS branches sa tibuok nasod. 

Magsugod sila sa pagdawat og aplikasyon sa umaabot Abril 2 ug molanat kini taman sa Oktubre 1, 2018. 

Samtang dili na mahimong mo-apply pa ang mga niapil na sa nahiunang loan restructuring program sa SSS. (ecb/PIA7-Bohol). 

===============

Red tide alert sa Dauis, Tagbilaran 

gi-isa na usab sa BFAR 

TAGBILARAN CITY, Marso 26--Gi-isa na usab sa Bureau of Fisheries and Aquatic Resources (BFAR) 7 ang red tide alert sa kabaybayonan sa lungsod sa Dauis ug syudad sa Tagbilaran dul-an usa ka tuig katapusan kining nakasinati og susamang alerto. 

Sa Shellfish Bulletin No. 11 nga gi-petsahan og Marso 22, 2018, si BFAR Director Eduardo Gongona mi asoy nga “coastal waters of Dauis and Tagbilaran City in Bohol are now positive for red tide toxin” (ang kabaybayonan sa Dauis ug dakbayan sa Tagbilaran sa Bohol nag-positibo karon sa red tide). 

Ang ubang mga lugar nga nag-positibo usab sa red tide naglakip sa mga kabaybayonan sa Leyte ug Carigara Bay sa Leyte; Lianga Bay sa Surigao de Sur; lalawigan sa Biliran; ug Honda Bay sa Puerto Princesa sa Palawan. 

Base kini sa pinakaulahing laboratory results gikan sa sampling nga gipahigayon sa BFAR. 

“All types of shellfish and alamang gathered” from these areas are not safe (Tanang matang sa kinhason ug alamang nga makuha niining mga lugara dili luwas), matud pa ni Gongona. 

Samtang si Bohol BFAR officer-in-charge Leo Bongalos miingon nga ang mga isda sa maong mga lugar makaon apan kinahanglang kuhaan og tinai, hasang ug sulod sa ginhawaan unya hugasan og maayo sa running water, kanang gikan sa gripo ug dili sa planggana. 

Matud pa nga ang red tide mosiaw tungod sa pagdagsa sa talagsaong matang sa algae nga makahilo ug kun adunay kalit nga pag-usab sa panahon gikan sa grabeng kainit ngadto sa pag-ulan. (ecb/PIA7-Bohol)