Pag-IBIG, gi-ubsan ang 

ilang interes sa housing loan

TAGBILARAN CITY, March 02 (PIA)--Mas gihingosgan pa sa Pag-IBIG Fund ang ilang pagpangdani sa mga Pilipino nga mokuha og kaugalingong balay sa tabang sa tanyag nilang pautang. 

Mas gipaubos na karon sa ahensya ang interes sa ilang pautang sa 6.375 porsiyento gikan sa kanhi 6.5%.

Kini mao ang fixed nga interest rate alang sa regular housing loan nga tulo ka tuig.

Ang mga may katakos nga motunga sa housing loan og 25% pataas, mokabat na lamang sa 5.375% ang interes sa pautang alang sa fixed period nga usa ka tuig. 

Apan matud pa sa Pag-IBIG, posible pa gihapong mabag-o ang gitakdang interes base sa madesisyonan sa ilang pamunoan.

Hasta ang “fire and allied perils insurance” o ang bayad sa insurance sa sunog ug uban pang katalagman sa housing loan nga P1 milyon pataas, gi-ubsan na usab sa Pag-IBIG gikan P4,000 ngadto sa P1,600 na lamang matag tuig. (ecb/PIA7-Bohol)

==============

Pagkuha og SIRB, 

1 ka adlaw na lang

TAGBILARAN CITY, March 02 (PIA)--Mas gipadali na karon ang proseso sa pagkuha sa mga aplikante sa ilang Seafarer's Identification and Record Book (SIRB) sa Maritime Industry Authority (MARINA).

Usa (1) ka adlaw na lamang ang pagkuha niini gikan sa kaniadto nga maabtan og halos kinse (15) ka adlaw o kapin pa.

Kini pinaagi na usab sa pagbaton og online appointment system aron makahatag og mas paspas ug mas maposlanon nga serbisyo sa mga aplikante. 

I-text na usab ang validity sa SIRB hangtod sa napulo (10) ka tuig. 

Gibanabanang naa sa kapin 90,000 ka seafarers ang maserbisyohan niini.

Nasayran usab nga nagbayad pa ang mga seaman og P25 matag hulam sa mga uniporme gikan sa MARINA Employees Cooperative (MEC) alang sa pagpakuha og litrato sa ilang aplikasyon. 

Apan sugod niadtong Enero 8, 2018, gipahunong na usab ni Department of Transportation (DOTr) Kalihim Arthur Tugade ang pag-kolekta sa uniform rental fee gikan sa mga aplikante sa SIRB sa MARINA. 

Giseguro ni Tugade nga walay mabayran ang mga aplikante sa paghulam og uniporme matag pakuha nila og litrato.

Kini tungod kay dili lamang ang pagpatukod og mga imprastruktura ug modernisasyon sa mga pantalan sa atong nasod apan apil na usab ang pagpatuman sa reporma ug bag-ong polisiya ang kinahanglan aron ma-isa ang kalidad sa serbisyo sa maritime industry sa nasod. (ecb/PIA7-Bohol)

=============

Awareness kalabot sa OSEC,

tabangan og pakatap sa AUDIO-Bohol 

TAGBILARAN CITY, March 01 (PIA)--Ni-komiter ang mga miyembro sa Association of United Development Information Officers in Bohol (AUDIO-Bohol) sa pagpakatap og awareness kalabot sa Online Sexual Exploitation of Children (OSEC).

Ang OSEC mao ang sekswal nga pang-abuso sa mga bata pinaagi sa pagsud-ong ug pagmando pinaagi sa internet.

Ang internet magamit sa pag-edukar, pagpahibalo, paglingaw, pag-konektar ug pagpa-ambit, apan magamit usab kini sa pag-abuso, pagpahimos ug pagpanakit ilabi na sa mga bata.

Tungod niini, ang International Justice Mission (IJM) nipahigayon og OSEC Messaging alang sa mga miyembro sa AUDIO-Bohol ug tri-media practitioners sa lalawigan aron matabangan sila sa pagpa-usbaw ug pagpakusog sa coverage sa OSEC. 

Si IJM Community Mobilization Manager Catherine Noveda, nipasabot nga ang IJM usa ka global organization nga nagprotihir sa mga kabos nga bata batok sa mga bayolenteng buhat.

Nakig-kumbuya sila sa mga lokal nga awtoridad sa pagluwas sa mga biktima sa bayolente, pagsang-at og kaso sa mga kriminal, pagpahiule sa mga survivors ug pagpalig-on sa atong sistema sa hustisya.

Gibutyag ni Noveda ang mga ‘red flags’ kun pag-ila sa mga sinyales sa pagpanghimulos ug sa sekswal nga pagpang-abusar sa bata nga mao ang mosunod: mugahin og taas nga oras online ug musikreto sa iyang mga linihukan; kanunay’ng saputon, iritable o bati og pamati human mag-online; hilom ug nerbyoso kung duna’y awtoridad sa palibot; dali lang musalmot sa mga kuyaw nga buhat lakip na ang drogas ug alcohol; ug may tataw nga pagkatensyonado, pisikal nga trauma ug sinyales sa pagpang-abusar sa bata.

Matud pa nga sama sa tinuod nga kalibotan, walay bata nga mahimong 100% nga luwas dinhi. 

Apan kitang tanan mahimong magtinabangay sa pag-amping sa mga batan-on aron mapanalipdan ug maluwas sila sa kagawasan sa internet. (ecb/PIA7-Bohol)

Ang mga miyembro sa AUDIO-Bohol sa ilang panagtapok niadtong Pebrero 28, 2018 didto sa JJ’s Seafood Village alang sa Online Sexual Exploitation of Children (OSEC) Messaging alang sa mga information officers ug tri-media practiitoners sa Bohol. (ecb/PIA7-Bohol)