Pipila ka mga nasod, nagbukas 

og trabaho alang sa mga OFW 

TAGBILARAN CITY, March 06 (PIA)--Nagbukas og liboan nga opurtunidad ang pipila ka nasod alang sa mga trabahanteng Pinoy ilabi na sa mga naapektuhan sa deployment ban sa Kuwait. 

Matud pa sa Philippine Overseas Employment Administration (POEA), nanginahanglan og welders ang Japan, Estados Unidos, Australia, Singapore ug New Zealand. 

Alang sa mga laborer, mahimong mo-apply sa Taiwan, Brunei, New Zealand ug Czech Republic. 

Bukas usab alang sa mga skilled nurses ang Singapore, Ireland, Germany ug Estados Unidos. 

Sigun pa ni POEA Deputy Administrator Joecelyn Sanchez, daku ang paglaom nga makapangita og laing trabaho sa mga nahisgotang mga nasod ang mga Overseas Filipino Workers (OFWs) nga gikan sa Kuwait tungod na usab sa ilang kahanas ug kasinatian. 

Dungan niini, nagpahinumdom usab ang POEA sa mga OFW nga mag-amping ug magbinantayon sa mga adtuang recruitment agency. (ecb/PIA7-Bohol) 

================

4Ps beneficiaries, may dugang 

benepisyo sugod karong buwan 

TAGBILARAN CITY, March 06 (PIA)--Sugod karong buwan, madawat na sa kapin sa pito ka milyong pamilya ang bag-ong cash subsidy gikan sa gobyerno. 

Matud pa sa Department of Finance, P200 matag buwan ang madawat sa naa sa 7.4 milyong pamilya isip tabang sa epekto sa Tax Reforms for Acceleration and Inclusion (TRAIN) law. 

Gipasabot ni Finance Undersecretary Karl Kendrick Chua nga ang cash subsidy lahi pa sa conditional cash transfer nga nadawat sa mga benepisyaryo ubos sa Pantawid Pamilyang Pilipino Program (4Ps). 

Gitawag sa DOF nga “unconditional cash transfer” ang maong benepisyo tungod kay dili sama sa CCT program, wala kini kaanib nga kondisyones. 

Unang makadawat og UCT ang naa sa 4.4 milyon ka 4Ps beneficiaries ug naa sa 3 milyon nga indigent senior citizens. 

Kinatibuk-ang P2,400 alang sa tibuok tuig ang madawat sa kwalipikadong pamilya. 

Paghidangat sa tuig 2019, ang P200 matag buwan isaka sa P300 o kinatibuk-ang P3,600 matag tuig. 

Samtang paghidangat usab sa Agosto, dugang nga 2.6 ka pamilya ang mahatagan sa nahisgotang benepisyo. 

Mokabat sa P25.67 bilyon ang gigahin sa gobyerno alang sa UCT nga nahisulod sa 2018 General Appropriations Act (GAA). 

Ang UCT madawat pinaagi sa ATM card transfers, bisan over the counter sa Land Bank of the Philippines (LBP) ug ubang mga rural banks. (ecb/PIA7-Bohol)