Human sa 21 ka tuig…

Amendment sa SS Charter

Natuki na gyud sa Senado

TAGBILARAN CITY, May 28 (PIA)—Mingsaka na sa Senado ang laraw sa pag-amendar sa Republic Act 8282 o ang Social Security Law of 1997.

Kini matud pa sa Social Security System (SSS) human sa pagsponsor niini ni Senador Richard Gordon sa Senado sa Senate Bill 1753 (SB 1753).

Ang katikaran gikalipay ni SSS President ug Chief Executive Officer Emmanuel F. Dooc tungod kay, human sa 21 ka tuig, nakit-an na sa mga senador ang panginahanglan nga kini amendahon pinaagi sa SB 1753.

Ang Senate Bill 1753, nga nagtumong sa pag-amendar sa SS Charter gituki na sa Committee of Government Corporations and Public Enterprises (GCPE) ug Labor ug sa Employment and Human Resources Development, subay sa ilang Committee Report Number 300, ubos sa pagpangulo ni Gordon.

Matud ni Dooc, mapasalamaton sila ni Senador Gordon sa pagpanguna niini pagduso sa pag-bag-o sa ubang mga probisyones sa SS Charter agi og tinag-as nga solusyon pagmintinar sa  ka-importante sa SSS ug aron mapatunhay ang paghatag niini og mga benepisyo sa katawhan.

Ang bag-ong bill nga gipadayag ni Gordon, nagsaysay sa panginahanglan sa pagbag-o sa kasamtangan nga SS Law aron matubag na ang mga suliran sa pagpundo alang sa pension, sa iyang mga benepisaryong sakop ug sa kinatibuk-ang katawhang may kalambigitan sa SSS.

Kon makalusot, ang SB 1753, matud ni Gordon, mopalapad, magpanalipud ug magpadaghan sa pundo sa SSS nga makalahutay sa paghatag og pension sa tanan, panahon sa pagretiro sa trabaho.

Kahinumduman nga sa pagdugang og P1,000 sa retirees pension sa mi-aging tuig, ang kadaghanon sa  pundo nga natigum sa SSS, igo na lamang sa sunod nga 10 ka tuig.

Niini, gipadayag sa SSS ang ilang kasibut nga unta, mapalusot na kining balaoda, aron may solbad na.

Segun sa mga gisugyot nga usbon sa balaod sa SS Charter, kini magpalapad sa gahum sa Social Security Commission (SSC), makapamaayo pa sa sistema sa benepisyo sa SSS ug sa pagpapas na unya sa mga penalidad sa mga may utang sa SSS nga dili na magkinahanglan pag pagsanong sa Presidente sa Pilipinas.

Dugang pa, ang balaodnon 1753, magtugot na sa SSC sa pagpangita pag laing pamuhunan aron makadugang sa pagpundo aron padaghanon pa ang kita sa pension fund, pagtimbang sa angayan nga binuwan nag hulogan subay sa sweldo basi usab sa mga pagtuon, ug sa pagpamaayo pa sa mga benepisyo nga ipadangat sa mga sakop sa SSS.

Gawas pa, ang SB 1753 maghimong institusyon na sa pugos nga pagpasakop sa tanang overseas Filipino workers aron may kadangpan sila sa panahon sa kalisud.

Gani, butyag ni Dooc nga ang pag-amend sa balaod, dili lamang makaayo sa mga 2.3 milyones ka pensioner apan usab ngadto sa 15.3 milyones nga active nga sakop sa SSS ug sa kapin sa 700 mil ka employers.

Ang mapabag-o nga balaod usab ang nakit-an nga paagi aron aron mas dali nga ikapatuman ang ikaduha nga hugna sa P1,000 pa nga dugang benepisyo sa mga SSS pensioners.

Giangkon sa SSS nga sa pagka karon, wala pay gahum ang SSS sa paghatag sa ikaduhang us aka libo nga dugang benepisyo.

Nanghinaut ang SSS nga maaprobahan na ang amendment sa SS Charter ning tuiga. (rahc/PIA-7/Bohol/SSS)