SIM Card Registration Bill, 

aprubado na sa Kamara 

TAGBILARAN CITY, Mayo 16 (PIA)--Aprubado na sa Kamara sa ikatulo ug katapusang pagbasa ang SIM card registration bill nga mag-mando sa tanan nga nigamit niini nga ipa-rehistro ang ilang sim card. 

Sa botong 167-6, nakalabang ang House Bill 7233 o ang balaodnong “Subscriber Identity Module (SIM) Card Registration Act” diin obligahon ang mga mopalit og sim card nga magpakita og valid identification card nga may larawan aron matumbok ang kailhanan sa mopalit. 

Kinahanglan usab nga ang mogamit og SIM card mag-accomplish og controlled-number registration form gikan sa telcos diin nakalatid ang full name, date of birth, gender ug address sa end-user nga nakabutang sa valid government-issued identification document nga may larawan. 

Alang sa mga foreign nationals nga mopalit og sim card, kinahanglan usab niini nga ipa-rehistro ang ilang full name, passport number ug address sa SIM card registration form. 

Gimanduan usab sa maong balaodnon ang mga telcos nga iduso ngadto sa Department of Information and Communications Technology (DICT) ang verified list sa ilang mga authorized dealers/agents sa tibuok nasod sulod sa 30 ka adlaw human mahimong epektibo ang balaodnon. 

Tuyo niining balaodnon nga tabangan ang mga ahensiyang tigpatuman sa balaod nga matultolan ang mga kriminal nga tiggamit og mga mobile phones nga may mga post-paid ug pre-paid SIM sa ilang mga ilegal nga aktibidad. 

Kun mahimo nang hingpit nga balaod, ang mga molapas niini pamultahon og P300,000 sa 1st offense, P500,000 sa 2nd offense ug P1M sa ikatlulong paglapas kun ang wala nisunod usa ka presidente ug pang executive officers sa telcos. 

Suspensiyon sa operasyon ug multa nga P5,000 hangtod P50,000 usab ang ipahamtang sa mga dili mosunod nga direct seller sa sim cards. 

Apan kun ang molapas niini mga opisyal o empleyado sa implementing agency ubos sa balaodnon, mahimo kining pahamtangan og suspensiyon o dismissal gikan sa serbisyo ug multa nga ipahamtang sa korte. 

Gipaabot sa DICT nga mapatuman na karong tuig ang pagpa-rehistro sa mga sim cards. (ecb/PIA7-Bohol).