Lumba sa dagan sa Alicia

Morehistro pa sa Sabado 

TAGBILARAN CITY, July 18 (PIA)—Sa labing bag-ong katikaran, modawat pa ang Alicia Trail Run 2018 series sa mga moparehistro, bisan pa sa adlaw mismo sa duwa: Sabado Hulyo 21 sa alas 4:00 sa kaadlawon. 

Kini maoy labing bag-o nga kalambu-an nga giluwatan sa mga tigpasiugda, pinaagi sa ilang race director ug Alicia Tourism officer Godelia Lumogdang. 

Ang lumba sa dagan subay sa mga dalan-dalan paingon sa labing anindot nga kabungturan sa Binabaje sa Barangay Camba-ol Alicia, maoy ika duha nga lumba sa dagan nga mahitabo sa gi-ingon na nga “Most Instagrammable Place,” sa Bohol, alang sa mga trailrunners. 

Niadtong Pebrero ning tuiga usab, dul-an sa 400 ka mga daganista gikan sa Bohol ug gani sa silingan nga mga nasud ang mi-salmot sa 5 kilometers ug 21 kilometers nga lumba sa offroad trails. 

Karon, sa pagsaulog sa Kapistahan ni San Juaquin ug Santa Ana, ang patron sa Alicia, gitanyag sa Municipality of Alicia ang ikaduha nga hugna sa lumba nga adto magtigi sa The Alicia Panoramic Park (TAPP). 

Ang TAPP maoy labing bag-o nga produktong pangturismo sa Bohol ug ang nag-inusara nga lugar lumbaanan sa offroad trail run, mountain biking ug extreme motocross sa Bohol. 

Nadiskobrehan human didto buksi ang labing una nga mountainbike festival sa lungsod tulo n aka tuig ang milabay, ang TAPP may nagbawod nga mga kabungturan nga gihabulan sa baga nga cogon ug gitadlas sa mga agi-anan sa tigpamalhin sa mga hayupan. 

Ang labing nindot nga bahin sa TAPP mao ang kinatumyan sa mga bungtud kay makit-an didto ang sanaw nga talan-awon sa Alicia, Mabini, Ubay, Candijay ug Pitogo lakip na ang Cogtong Bay. 

Alang sa Alicia Trail Run Series, tulo ka kategorya ang gibuksan: 5 K, 10K ug ang gikaintapan nga 21K. 

Ang mga organizers modawat pa sa registration sa mga buot mosalmot: P800 sa 21K, P500 sa 10K ug P400 sa 5K. 

Ang lumba, segun pa ni Lomugdang, magsugod sa alas 4:30 sa 21K, diin kinahanglan ang headlamp sa mga managanay, ug sa pag-dan-ag na, 5:30 sa 10K ug 6:00 sa 5K. 

Human sa unang lumba sa dagan, mibutyag ang Alicia nga hinay hinay na nila nga natagamtam ang bunga sa ilang sports nga matang sa turismo. 

Ang TAPP, nga diin magtigi ang mga hawod nga managaganay, bukas na sa trekking ug camping activities, diin ang mga taga Camba-ol ug ang mga molupyo sa mga silingan nga mga barangay maoy mga tour guides. 

Aduna na usab sila’y package trekking tours nga naglambigit sa pagpahimulos usab sa mga local nga pagkaon isip bawon o pangpatagbaw sa gutom. 

Sa umaabut nga lumba sa Sabado pohon, daghang taga didto nga midahum nga may maayong makuha ang mga taga lungsod nga makatabang sa kadaghanan sa pagpa-alibyo sa ilang kabus nga kahimtang didto. (rahc/PIA7/Bohol)

TURISMO NGA PASINGOT. Buksan na usab ang mga dalan-dalan sa TAPP alang sa lumba sa dagan karong Sabado Hulyo 21, agi og paduwa sa pista ni Santa Ana San Juaquin. Ang TAPP maoy bag-ong produkto sa turismo nga gilantaw sa Alicia nga mohatag sa mga tawo og kapanginabuhian. (rahc/PIA7/Bohol)