Magbantay sa habagat 

nga maguyod sa bagyo 

TAGBILARAN CITY, July 16 (PIA)— Magbantay sa habagat nga maapektohan ug maguyod sa bagyo paingon sa itaas, pahimangno sa state weather bureau. 

Kini human mi-anam og ka kusog ang bagyo nga gihinganlan og Henry, samtang padayon kini nga nagpa-ingon sa direksyon nga pa-kasadpan og mopingis sa ngilbit sa amihanang Luzon. 

Segun sa state weather bureau subay usab sa ilang mga kahimanan nga naniid sa dagan sa bagyo, ganihang alas 7:00 sa buntag, ang sentro sa bagyo o tropical depression Henry gibanabana nga naa sa 440 km kasubangan sa (East of) Aparri, Cagayan (18.6°N, 125.8°E). 

Dala niini ang maximum sustained winds sa 55 kilometros matag oras (kph) duol sa sentro niini ug may ikahapak nga kalit nga paghuros nga moabut sa 65 kph samtang nagtadlas sa kadagatan paingon sa Babuyan Group of Ilands sa gikusgon nga 35 kph, matud pa sa Philippine Atmospheric Geophysical and Astronomical Services Administration (PAG-ASA). 

Ang bagyo, gibanabana nga mohasi sa silinganan ng bahin sa Babuyan Group of Islands sa Hulyo 17 sa gabii, hinungdan nga gibugtaw na sa state weather bureau ang Tropical Storm Warning Signal No. 1 sa Batanes, amihanang bahin sa Cagayan apil ang Babuyan Group of Islands, amihanang bahin sa Apayao, ug amihanang bahin sa Ilocos Norte. 

Dinhi nga mga dapita, sulod sa 36 ka oras, hangin nga moabut sa 30 ngadto sa 60 kph mohasi sulod sa 36 oras gikan sa buntag sa Lunes. 

Dinhi nga mga dapita, masinati ang panagsang pag-uwan nga ubanan sa kalit nga mga kusog nga huros sa hangin labi na gayud sa mga may TCWS nga na-paibabaw. 

Sa ilang severe weather bulletin No. 4 nga gipagawas alas 8:00 sa Hulyo 16, 2018, gipahimangno-an usab sa state weather bureau PAG-ASA, nga tungod ni Henry, maguyod niini ang Habagat paingon sa ibabaw nga bahin sa nasud. 

Ang habagat, maoy maka-angin sa kusog nga mga bunok sa pag-uwan sa Metro Manila, Zambales, Bataan, Cavite, Batangas, mga lalawigan sa Mindoro, Palawan ug Western Visayas, ugmga panagsang uwan-uwan ug pangilat, pagpanugdog sa mga nahibilin nga bahin sa Luzon nga wala malakip sa TCWS. 

Kalakip na usab niini, ang mga nanimuyo sa mga lugar nga lunopanan ug kadtong naa dapit sa mga delikado sa pagkahunlak sa yuta, sa padayon nga pagpaminaw sa mga katikaran sa dagan sa panahon ug sa pagpakisayud sa mga local nga disaster risk reduction ug management offices, ug sa paghimo na sa gikasabutan nga buhatonon batok sa pagbaha paglunop ug pagkahunlak sa yuta. 

Niini usab, kadtong mga mananagat nga may gagmay nga sakayan, ilabi na didto sa mga lugar nga may nga naisa ang TCWS ug sa mga kadagatan sa kasadpan nga bahin sa Luzon, gipahimangno-an nga dili usa molawod tungod sa gitagna nga dagkong bawod nga mamugna sa nagsingabut nga bagyo, ug sa habagat. 

Ang bawod, segun pa sa PAG-ASA ilabi na sa lawod, mahimong moabut sa 1.25 ngadto sa 4.0 metros. (rahc/PIA-7/Bohol)