Pamilya sa 4Ps, mas preparado na karon 

kun may moabot nga katalagman

TAGBILARAN CITY, July 16 (PIA)--Ang Pantawid Pamilya partner-beneficiaries sa rehiyon sa Central Visayas mas preparado na karon kun may moabot nga mga katalagman.

Pinaagi sa Family Development Session (FDS), binuwan nga sesyon nga panagtigom sa 4Ps partner-beneficiaries diin makakat-on sila og mga bag-ong kahibalo ug kahanas sa nagkalain-laing hisgotanan sama sa disaster preparedness.

Disyembre 2014 sa dihang nagbilin og dakong kadaot ang bagyong Queenie sa Central Visayas nga nikutlo og mga kinabuhi ug nagbilin og dakong kadaot sa mga kabtangan.

Duha sa pamilyang naapektohan sa maong bagyo mao ang pamilya Garay ug Cachero sa Can-upao, lungsod sa Jagna ug Alejawan sa lungsod sa Duero, ning lalawigan sa Bohol.

“Dili gyud namo makalimtan ang bagyong Queenie kay naguba gyud among balay ug kadtung hitabo naghatag namu og leksyon nga mangandam gayud ug mu-advice nga for evacuation, mubakwit gyud ang tibuok pamilya, matud pa ni Marissa Garay.

Isip pagpangandam sa bisan unsang katalagman, ang pamilya Garay may kaugalingon nang Emergency Balde o E-Balde nga may sulod nga mga importanteng mga dokumento ug mga nag unang kinahanglanon o basic needs sa usa  ka pamilya nga daling madala sa panahon sa pag-bakwit.

“Naa na sad mi Family Disaster Action Plan nga maghatag og giya kung unsay buhaton sa matag miyembro sa pamilya,” dugang pa ni Marissa.

Samtang si Mary Jane Cachero mapasalamaton usab sa iyang mga nakat-onan gikan sa FDS ug  sa mga leksyon nga nakuha gikan sa mga pagbansay nga gihatag sa Barangay Disaster Response Team. 

“Ako pud kini gipa-ambit sa akong bana ug sa upat nakong mga anak kay importante gyud nga kabalo ang tanan kung unsay buhaton pananglitan adunay kalamidad sama sa bagyo o linog,” matud pa ni Mary Jane.

Sila Marissa ug Mary Jane parehong ni-uyon nga ang pagpangandam mahinungdanon gayud tungod kay makuhaan ang epekto sa bisan unsang katalagman nga moabot.

Karong tibuok buwan sa Hulyo, atong gisaulog ang National Disaster Resilience Month (NDRM) nga nagdala sa temang "Katatagan sa Kalamidad ay Makakamtan Kapag Sapat ang Kaalaman sa Kahandaan.” (ecb/PIA7-Bohol/DSWD)

 

Ang E-Balde ug Family Disaster Action Plan sa pamilya ni Marissa Garay sa Can-upao, lungsod sa Jagna, Bohol. (DSWD-7)