Mga Social Pensioners,

nakasugod na’g dawat sa UCT grant

TAGBILARAN CITY, July 16 (PIA)--Gipahibalo sa Department of Social Welfare and Development (DSWD) sa Central Visayas nga nagsugod na sila og panghatag niadtong Sabado, Hunyo 14 sa tabang pinansyal ubos sa Unconditional Cash Transfer (UCT) ngadto sa 47,289 ka social pensioners nga mga indigent senior citizens.

Sa kinatibuk-ang 47,289 social pensioners, 18,628 niini ang gikan sa Bohol, samtang ang 28,661 niini gikan sa Cebu.

Ang programang UCT sa nasudnong kagamhanan nihatag niini pinaagi sa Tax Reform for Acceleration and Inclusion (TRAIN) law.

Base sa joint circular sa DSWD, Department of Finance (DOF) ug  sa Department of Budget and Management (DBM) kalabot sa implementasyon sa UCT program, ang pondo gibutang sa Land Bank of the Philippines (LBP) ug gamiton kini base sa operational guidelines sa DSWD.

Ang UCT cash grant lahi pa nga benepisyo alang sa mga Pantawid Pamilya partner-beneficiaries ug Social Pensioners nga nagdawat usab sa ilang regular cash grant ug cash stipend.

Ang UCT gi-konsiderar nga kinadak-ang tax reform mitigation ubos sa TRAIN law nga nagtinguha sa paghatag sa 10 milyong benepisyaryo uban sa cash subsidy nga P200 matag buwan alang sa tuig 2018 ug  P300 matag buwan sa 2019 ug 2020. (ecb/PIA7-Bohol)