Mga Bol-anon, nangharos 

sa AliciaTrail Run Series 

TAGBILARAN CITY, July 23 (PIA)--Tulo ka Bol-anon ang nangharos sa bag-o lang gipahigayon nga Alicia Trail Run Series. 

Niadtong Sabado, Hulyo 21, gibuksan na usab ang mga dalan sa The Alicia Panoramic Park (TAPP) alang sa lumba sa dagan nga 5K, 10K ug ang gikaintapan nga 21K. 

Ang Philippine Team member ug Boholano triathlete gikan sa lungsod sa San Miguel nga si Emmanuel Comendador ang nilangkat sa 21 kilometer male category sulod sa 2 ka oras, 2 minutos ug 55 segundo. 

Ang atletang taga lungsod sa Maribojoc nga si Jonathan Pagaura ang unang niabot sa finish line sa 10 kilomentro nga dalan sulod sa 59 minutos ug 13 segundo. 

Ug ang magtutudlo ug local trail runner sa La Hacienda National High School, Enrique Cagulang Jr., ang unang naka-kumpleto sa 5K nga dagan sulod sa 55 minutos ug 30 segundo. 

Samtang sa Women’s Category, lahi usab ang estorya diin ang Cebuano nga si Jelma Monsanto ang nakalangkat sa 21K sulod sa 3 ka oras, 3 minutos ug 42 segundo. 

Sa 10 kilometrong dagan, si Linajane Aluba usab ang naka-una og abot sa finish line sulod sa 46 minutos ug 44 segundo. 

Ug sa 5 kilometer category, ang Spanish runner nga si Jana Albinez ang unang naka-kumpleto sa murag sayon nga rota sulod sa 46 minutos ug 44 segundo. 

Ang maong lumba nga gisalmotan sa mga magdadagan o runners gikan sa Cebu, Leyte, Negros ug mga langyaw gikan sa Spain ug New Jersey, nisubay sa mga highways, barangay roads ug kasagaran sa maanyag nga talan-awon subay sa dalan sa TAPP, ang kinabag-ohan nga extreme adventure park sa dili pa mokanaog sa kabungtoran sa Cambaol ug Cabatang. 

Gitumong nga pinakabag-ong produkto sa turismo nga nakasakop sa atensyong internasyonal, ang maong Trail Run nakatabang usab sa kita sa mga lokal sa maong lungsod. 

Ang lungsod sa Alicia nigamit sa ‘home stay programs’ sa pagpadayon sa mga atleta samtang nigamit usab sa mga lokal nga suppliers alang sa mga pagkaon ug mga gamit sa lumba, apil na ang mga serbisyo sa lokal nga bayani sa dalan: ang Bohol East Trail Riders isip ilang race emergency evacuation team. (ecb/PIA7-Bohol) 

Gibuksan na usab niadtong Sabado ang mga dalan sa The Alicia Panoramic Park (TAPP) alang sa lumba sa dagan nga 5K, 10K ug ang gikaintapan nga 21K diin nalangkat sa Bol-anong si Emmanuel Comendador ang 21K (tunga nga gi-representahan sa iyang teammate nga si Jonathan Pagaura) kauban sa ubang mananaog sa 21 kilometro nga dagan nga si Andy Tuñacao (2nd placer) ug Spanish Juaquin Escanillas Lopez (3rd placer). (PIA7-Bohol)