Nograles mipasalig papundohan 

ang big ticket projects sa Bohol 

TAGBILARAN CITY, Bohol, JULY 23 (PIA)—Misapalig si House Committee on Appropriations chairman ug Davao City Representative Karlo Alexei Nograles nga mopaluyo ug mosuporta sa pagpundo sa major ticket budget requirements so Bohol ilabi na sa imprastraktura nga gitumbok nga makatabang sa pag-usab sa ekonomikanhong dagway sa lalawigan. 

Si Nograles, kinsa maoy pinasidunggang bisita sa paghandum sa Bohol sa iyang ika 146 nga kasumaran, namulong atubangan sa gatusan ka mga Bol-anon nga nagkatapok didto sa kalihukan sa paghandum sulod sa Bohol Cultural Center, Hulyo 22. 

Isip kortesiya sa usa ka dinapit, alang sa mga proyektong imprastraktura sa Bohol, gibutyag ni Nograles nga sa nagsingabut nga Budget Hearing sa Kongreso, automatic ang approval nga iyang ihatag sa mga pangayoon sa Bohol. 

Sa mga big ticket budget items sa 2019 nga budget year, sama sa P124 bilyones nga Cebu-Bohol bridge, sa Php96 bilyones nga Leyte-Bohol link, sa Php 4.1 bilyones nga Bohol Northeast Basin Multi purpose dam ug sa gihangyo nga dugang PhP 1.9 bilyones sa Panglao Airport, gipalanog ni Nograles ang iyang wala’y pagduhaduha nga suporta. 

Sa iyang pakigpulong, gibasi ni Nograles ang iyang maayong balita alang sa mga Bol-anong nagsaulog sa ilang ika 146 ka tuig nga kaugalingnan gikan sa Sugbo, subay usab sa over-arching development frameworks sa Bohol. 

Pananglit, gipahibaw sa kongresista nga dinhi sa Bohol iprayoridad sa kagamhanan ang pagpataud sa libre nga wireless fidelity (wifi) sa mga pangpubliko nga lugar segun sa saad ni Presidente Rodrigo Duterte. 

Dinhi usab, matud pa ni Nograles, ipatuman og una ang national identification system nga maglakip sa 18 anyos ngadto na sa labing taas nga pangedaron. 

Suportahan usab sa Kongreso ang mga paningkamot sa Bohol nga kahatagan og prayoridad sa budget ang pagpundo alang sa mga kadalanan nga nagpaingon sa mga suroyanan sa turista. 

Gawas niini, mipadayan usab si Nograles nga iyang ipadayon ilang suporta sa mga nasugdan nga mga kabag-ohan ni Presidente Duterte sama na lang sa libre nga patubig o irrigasyon, tuition ug miscellaneous fees sa mga state colleges and universities, ang libre nga pagpakaon sa mga kabataan nga nagkuwang sa nutrisyon sulod sa 120 ka adlaw. 

Patas-an na usab ang coverage sa mga social pension sa mga nagkalisud nga mga senior citizens, libre nga PhilHealth sa mga banay nga kabus, ug dugang nga usbaw sa sweldo sa mga empleyado sa kagamhanan. (rahc/PIA-7/Bohol) 

Giubanan ni Kong Rene Relampagos si Kong Karlo Alexei Nograles pasulod sa bag-ong gibuksan nga mga galleria sa National Museum sa Bohol atul sa ika 164 nga pagsaulog sa kugalingnan sa Bohol gikan sa Sugbo. (rahc/PIA-7/Bohol)